Asus şirkəti ötən gün flaqman Zenfone seriyasını yeniləyib. Belə ki, dünyanın ən kompakt ölçülü flaqman smartfonu Zenfone 9 təqdim edilib. Smartfonun dizaynından danışmağa başlasaq, arxa tərəfdə 2 ədəd böyük çıxıntıya sahib kamera modulu diqqət çəkir. Kamera modulunun kənarlarındakı gümüşü işləmələr, arxa qapağa həkk edilmiş yazılar və elementlər cihaza çox yaxşı görkəm qatıb. Sələfi olan Zenfone 8 ilə müqayisədə yeni dizayn daha yaxşı görünür. Elə Zenfone 8 demişkən, Zenfon 9 seriyası öz sələfi ilə eyni (169 qram) çəkiyə sahib olsa da gövdəsi 0.4 mm daha ensiz, uzunluğu 2.5 mm daha azdır. Gövdəsinin uzunluğu 146.5 mm, eni 68.1 mm təşkil edir. Müqayisə üçün deyə bilərik ki, 5 il əvvəl çıxan və ən sevilən kompakt smartfonlardan biri olan Xiaomi Mi 6 modeli ilə demək olar eyni ölçülərdədir. Gəlin Zenfone 9 seriyasının texniki xüsusiyyətlərinə daha yaxından nəzər salaq.
Zenfone 9 seriyası hansı texniki detallara malikdir?
Smartfon öz gücünü sektorun ən güclüsü olan Snapdragon 8+ Gen 1 çipsetindən alır. Eyni zamanda LPDDR 5 və UFS 3.1 yaddaş texnologiyalarına sahibdir. Asus şirkəti daha çox oyun smartfonu hazırlamaqla tanındığından bu cihaza ROG seriyasından gələn oyun optimizasiyalarını dəstəkləyən tətbiqlərini əlavə edib. Game Genie ilə oyunlarda bir çox əlavə xüsusiyyətlər, sistem temperaturunun müşahidəsi, çipset performansının nizamlanması və.s həyata keçirilə bilər. Eyni zamanda bu cihazda da buxar qazanlı soyutma sistemi istifadə edilib.
Zenfone 9 seriyasının ən əhəmiyyətli komponenti isə təbii ki, ekranıdır. Cihaz Samsung istehsalı 5.9 düymlük FHD+ ekran paneli ilə təchiz edilib. OLED tipi ekran panelinin görüntü yeniləmə tezliyi 120Hz təşkil edir. Uyğun olaraq 240Hz sensor tezliyinə (barmağın hərəkətinin işlənmə sürəti), HDR 10+, P3 rəng qamutu, DC-Dimming (insan gözünə zərəri azaldan titrəmə) xüsusiyyətlərinə və.s sahibdir. Yəni Samsung istehsalı ekran panellərindəki yüksək səviyyəli standartlar bu ekran panelində də mövcuddur. Ən mənfi cəhəti kənar çərçivələrinin xeyli qalın olmasıdır. Xüsusilə də ekranın çənə qismi xeyli qalındır.
Asus brendi Zenfone 9 seriyasının kamera parametrlərinə yalnız istifadəçiyə lazım olan şeyləri əlavə edib. Əsas kamera IMX766 50MP F/1.9 sensoruna sahib olub, 6 oxlu gimbal tipli stabilizatorla (OIS əvəzedicisi) gücləndirilib. İkinci IMX363 12MP sensoru isə 113° ultra-geniş bucaqlı (eyni zamanda makro) kamera funksiyasını yerinə yetirir. Ən əsası isə Zenfone 9 modeli 4K keyfiyyətdə 60FPS, 8K keyfiyyətdə 24FPS videolar qeydə almağı bacarır. Kameralar əlavə olaraq EIS və avtofokus imkanını da özündə birləşdirir. Selfi kamerası isə IMX663 12MP sensoru ilə gücləndirilib. Təəssüf ki, selfi kamerası yalnız 4K keyfiyyətdə 30FPS videolar qeydə almağı bacarır. Heyif ki, telefoto kamerası mövcud deyil.
Cihaz kompakt ölçüsünə baxmayaraq 4300mAs həcmli batareya ilə qutudan çıxır və 30 Vt ilə şarj olunur. Suya və toza davamlılıq tərəfində IP68 sertifikatı ilə qorunur. Asus şirkəti səsə əhəmiyyət verdiyi üçün Qualcomm Dirac tuning xüsusiyyətini də Zenfon 9 seriyası modelə əlavə edib. Nəticədə cihazdakı 2 ədəd geniş diapazonlu səs ucaldanın hər biri Qualcomm Aqstic amplifikatoruna sahibdir. Cihaz LDAC, AAC, aptX HD formatlarını dəstəkləyir. Belə bir səs sisteminə sahib cihaza normal olaraq 3.5mm qulaqlıq girişi quraşdırılıb. Smartfon Android 12 əməliyyat sisteminə sahibdir. Növbəti 2 il ərzində Android 14-ə qədər yeniləmə alacaq.
Zenfone 9 modelinin qiyməti:
- 8-128GB 800€
