Apple brendi ötən ay təqdim etdiyi yeni iPhone 16 seriyasının başlanğıc səviyyəli modeli olan iPhone 16 modelinin istehsalını azaldır. Belə ki, Apple təchizat zəncirinə göndərdiyi təlimatda komponent istehsalını azaltmağı xahiş edib. Analitiklər iPhone 16 seriyasının gözlənildiyi kimi satılmadığını düşünürlər.
Ölkəmizdə də artıq rəsmi olaraq bir sıra mağazalarda qiyməti məlum olan iPhone 16 seriyası Apple Intelligence ilə həvəskarlarının gözləntilərini artırmışdı. Lakin, ilk təəssürat ondan ibarətdir ki, istehlakçılar smartfonlara gözlənildiyi qədər maraq göstərmirlər. Analitiklərin hesabatlarına görə, şirkət oktyabr-noyabr-dekabr ayları üçün çip tədarükü zəncirində 3 milyon azalma əmri verib. Habelə, analitiklər iPhone 16 satışlarının ötən ilki sələfinə nəzərən 15% azalacağını təxmin edirlər.
Hesabatlarda bu azalmanın bir risk olduğu, Apple Intelligence strategiyasının yaxşı idarə edilmədiyi və gecikmiş yeniləmənin istehlakçıları yeni seriyalardan uzaqlaşdırdığı bildirilir. Xüsusilə tək paket əvəzinə bölünmüş paketlərin təklif ediləcəyi risk olaraq görülür. Bundan əlavə, Apple-ın sentyabrın sonunda bitən rübdə 51 milyon iPhone satacağı gözlənilir. Ümumiyyətlə, uzun müddətdir gözlənilən Apple Intelligence ilk növbədə ABŞ-da yaşayan istifadəçilər üçün əlçatan olacaq. Daha sonra isə bu süni intellekt xüsusiyyətləri növbəli şəkildə digər bazarlar üçün də əlçatan olmağa başlayacaq. Ölkəmizdə isə bu xüsusiyyətlərin çalışıb-çalışmayacağı hələlik məlum deyil.
