Son dövrlərin ən inqilabi yeniliklərindən hesab olunan ChatGPT bu dəfə beyin şişlərinin diaqnostikasında radioloqları qabaqlayır. Belə ki, süni intellekt modeli radioloqolardan daha əsaslı nəticələr ortaya çıxarır. Tədqiqatçılar dəqiqlik dərəcəsini artırmaqla həkimlərin iş yükünü yüngülləşdirmək istəyirlər.
OpenAI-nin GPT-4 LLM-ə əsaslanan AI modeli olan ChatGPT beyin şişlərinin diaqnostikasında təsirli imkanlar nümayiş etdirir. Osaka Metropolitan Universiteti Tibb Fakültəsinin tədqiqatçıları əməliyyatdan əvvəl 150 beyin şişi MRT hesabatından istifadə edərək ChatGPT və radioloqların diaqnostik dəqiqliyini müqayisə edən bir araşdırma aparıblar. Nəticələr olduqca təəccüblüdür. Belə ki, ChatGPT neyroradioloqların (72 faiz) və ümumi radioloqların (68 faiz) dəqiqliyini üstələyərək 73 faiz nəticə əldə edib. Tədqiqat həmçinin ChatGPT-nin diaqnostik dəqiqliyinin klinik hesabatı kimin yazdığından asılı olaraq dəyişdiyini ortaya çıxarıb.
Neyroradioloqların hesabatlarını şərh edərkən süni intellekt modeli 80 faiz dəqiqlik dərəcəsinə nail olub. Ancaq ümumi radioloqların hesabatlarına gəldikdə, bu rəqəm 60 faizə qədər azalıb. Görünən odur ki, hesabatın arxasındakı radioloqun növü ChatGPT-nin diaqnozlarının nə qədər dəqiq olacağına həqiqətən təsir edə bilər. Aspirant Yasuhito Mitsuyama və dosent Daiju Uedanın rəhbərlik etdiyi tədqiqat qrupu ChatGPT kimi böyük dil modellərinin digər diaqnostik görüntüləmə sahələrində potensialını daha da araşdırmağa hazırlaşır. nların məqsədi həkimlərin yükünü yüngülləşdirmək, diaqnostik dəqiqliyi artırmaq və daha yaxşı təhsil mühiti üçün süni intellektdən istifadə etməkdir.
