Bildiyimiz kimi, Apple ötən günlərdə yeni Apple Intelligence süni intellekt xüsusiyyətlərini təqdim edib. Lakin konfrans tədbirində təqdim edilən süni intellekt xüsusiyyətlərinin yalnız iPhone 15 Pro və daha yuxarı modellərində əlçatan olacağı xəbəri gündəm olmuşdu. İndi isə Apple yeni süni intellekt xüsusiyyətləri üçün niyə iPhone 15 Pro tələb etdiyini izah edib.
![Apple iPhone 15 Pro](https://tedroid.com/media/2024/06/apple-iphone-15-pro-suni-intellekt.jpeg)
Süni intellekt bazarındakı hərəkət, əlbəttə ki, Apple kimi texnologiya nəhənglərinin diqqətini çəkib. Apple iPhone, iPad və Mac cihazlarına böyük dil modelləri, vizual redaktə və mətn yığımı kimi xüsusiyyətləri özündə birləşdirən Apple Intelligence adlı süni intellekt alətlərini bizlərə təqdim edib. Lakin, bütün yeni süni intellekt alətlərindən istifadə etmək üçün Apple istifadəçiləri iPhone 15 Pro və iPhone 15 Pro Max modellərindən birini istifadə etməlidirlər. Mac və iPad tərəfində cihazlar üçün ən azı M1 çipinin olması tələbi var. Bu vəziyyət açıqlanandan bəri istifadəçilər Apple-ın səbəbləri ilə maraqlanır.
Apple-ın Süni İntellekt/Maşın Öyrənməsi üzrə rəhbəri John Giannandrea, Baş Marketinq Direktoru Greg Joswiak və Proqram Mühəndisliyi Başçısı Craig Federighi mövzu ilə bağlı sualları cavablandırıb. Giannandrea, böyük dil modellərinin hesablama baxımından “bahalı” olduğunu və buna görə də cihazın tezliyi və Apple Neural Engine ölçüsü kimi meyarlara əsaslanaraq qərar qəbul etdiklərini söylədi. Giannandreanın sözlərinə görə, bu alətləri köhnə modellərdə istifadə etmək texniki cəhətdən mümkün olsa da, praktikada çox səmərəsiz və ləng işləyir. Bu qərarın marketinqlə bağlı olub-olmaması ilə bağlı suala Gruber belə cavab verib: “Xeyr, qətiyyən yox. Əks halda, biz bunu son iPad və Mac kompüterlərimiz üçün edəcək qədər ağıllı olardıq.” Federighi, yeni texnologiyanı mümkün olduğu qədər köhnə modellərə gətirməyi hədəflədiklərini, lakin tələblərə görə bunu edə bilmədiklərini ifadə edib. Qeyd edək ki, köhnə iPhone modellərində RAM həcminin 8GB-dan az olması da əsas çatışmazlıqlar arasındadır.