Bir çox texnologiya nəhəngi kimi, Apple brendinin də uzun müddətdir ki, batareya üzərində çalışdığı hər kəsə məlumdur. Belə ki, ABŞ mərkəzli texnologiya nəhəngi hər il yeni cihazlarını təqdim edərkən daha performanslı və təkmilləşmiş batareyalardan istifadə edir. İndi isə Apple yeni iPhone modelləri üçün eyni ölçüdə daha böyük batareya həcmi təklif etməyə imkan verən patentini açıqlayıb. Batareya konnektorları ilə əlaqəli patent sayəsində gələcəkdə iPhone modellərindən daha yüksək tutumlu və kiçik ölçülü batareyaları görə bilərik.
Son zamanlar biz tez-tez yeni sürətli enerji doldurma texnologiyalarına və yüksək batareya tutumuna malik Android cihazlarını görürük. Android smartfon istehsal edən şirkətlərdən geri qalmaq niyyətində olmayan Apple da smartfonlarında daha böyük tutumlu batareyalar təklif etməyə çalışır. Apple-ın “Dik dırnaqlara sahib batareya hüceyrələri” adlı yeni patenti, eyni ölçüdə daha böyük batareya həcmi təklif edəcək. Bu patent ilk dəfə 2021-ci ilin sentyabrında təqdim edilib və nəhayət 2 gün öncə dərc edilib. Apple həmçinin batareya ömrünü artırmaq üçün membranlar və qatlana bilən batareya komponentləri kimi üsulları araşdırır.
Apple-ın yeni patenti gələcək iPhone-ların batareya konnektorunun bizim öyrəşdiyimiz ənənəvi batareyalardan fərqli olacağını göstərir. Texnologiya nəhəngi, yüksək tutumlu batareyaya nail olmağın batareyadakı nişan mövqeləri ilə əlaqəli olduğunu bildirir. Onu da qeyd edək ki, Apple bu patenti yenicə dərc etdiyi üçün onun iPhone 16 seriyasında istifadə edilməsi ehtimalı azdır.
