İngiltərənin Aston Universitetinin tədqiqatçıları, tək standart fiber optik kabel vasitəsilə saniyədə 301 terabit məlumat ötürməklə yeni sürət rekordu əldə ediblər. Qeyd edək ki, bu sürət evlərdə istifadə olunan genişzolaqlı sürətdən 3,3 milyon dəfə yüksəkdir. İndiyə qədər qeydə alınan ən yüksək sürət olan bu rekord, əvvəllər fiber optik sistemlərdə istifadə olunmayan yeni dalğa uzunluğu zolaqlarından istifadə etməklə əldə edilib.
Komanda bir standart fiber optik kabeldən istifadə edərək saniyədə 301 terabit və ya saniyədə 301 000 000 meqabit məlumat ötürüb. Qeyd edək ki, Speedtest-in 2024-cü ilin fevral ayı məlumatlarına əsasən, qlobal orta internet sürəti 92 Mbit/s təşkil edir. Bu nailiyyət, Aston Fotonika Texnologiyaları İnstitutu tərəfindən Professor Wladek Forysiak və Dr. Ian Phillips-in birgə səylərinin nəticəsidir. Tədqiqatçılar Yaponiyanın Milli İnformasiya və Kommunikasiya Texnologiyaları İnstitutunun və ABŞ-ın Nokia Bell Laboratories-in tədqiqatçıları ilə işləyiblər.
Qlobal miqyasda məlumatlara tələbat artdıqca, bu yeni hazırlanmış texnologiyanın gələcək tələbatı ödəməyə kömək edəcəyi gözlənilir. Alimlər adi mis kabellərin sürət baxımından uyğun gələ bilmədiyi fiber optik kabellərdən istifadə edərək işıq vasitəsilə məlumatları ötürüblər. Qeyd etdiyimiz kimi, komanda bu nailiyyətə adi fiber optik sistemlərdə hələ istifadə olunmayan yeni dalğa boyu zolaqlarından istifadə etməklə nail olub. Fərqli dalğa uzunluğu lentlərini, fiber optikdən ötürülən işığın müxtəlif rənglərinə ekvivalent hesab edə bilərik. Bu zolaqlara daxil olmaq üçün komanda optik gücləndiricilər və optik qazanc ekvalayzerləri adlanan yeni cihazlar hazırlayıb.
