USB-C standartı üçün Senatorlar Edvard J. Marki və Elizabet Uorren tərəfindən hazırlanmış məktubda standartlaşdırılmış şarj portunun qəbul edilməsinin zəruriliyi ilə bağlı yeni qeydlər edilib. Məktubda elektron tullantıların ətraf mühitə vurduğu zərər, istehlakçılar üçün çeşidli məişət elektronikasının maddi çətinlik yaratması kimi səbəblərdən bəhs edilir.
Məktubda deyilir:
Avropa İttifaqı (Aİ) elektronika istehsalçılarını Aİ daxilində mobil cihazlar üçün ümumi şarj cihazı qəbul etməyi öhdəsinə götürən mühüm qanunu yenicə qəbul etdi. Biz Ticarət Departamentini bu problemlərin həlli üçün atdığı addımlara görə təqdir edirik. Belə ki, lazımsız istehlak xərclərini azaltmaq, elektron tullantıları minimuma endirmək üçün hərtərəfli strategiya hazırlamaqla Aİ-nın başlatdığı bu işi davam etdirək!
Bu qayda nə zamandan qüvvəyə minir?
Avropa ittifaqının qanunu 2024-cü ilin payızında qüvvəyə minir. Bütün kiçik və orta ölçülü cihazlarda USB-C doldurma portundan istifadə etməyi tələb edəcək. Buraya bütün smartfonlar, planşetlər, portativ dinamiklər, elektron oxuycular,oyun konsolları, kameralar və qulaqlıqların qabları daxildir. Notbuklar da bu yeni qanuna tabe olacaq. Qanun qəbul edildikdən 40 ay sonra qüvvəyə minəcək. Bu da o deməkdir ki, artıq 2024-cü ildən etibarən elektronikalar USB-C standartına uyğun olaraq hazırlanacaq.
Məktubun sonunda deyilir:
Biz sizi ABŞ-da ümumi şarj standartının olmaması ilə bağlı həm istehlakçıları çətinə salmayacaq, həm də ətraf mühiti qoruyacaq hərtərəfli bir plan hazırlamaq üçün Ticarət Departamentindəki ofis və agentliklərlə işləməyə çağırırıq.
USB-C standartı hər kəs üçün uyğundurmu?
Apple bu siyasət dəyişikliyindən ən çox təsirlənən şirkətdir. Şirkətin artıq gələcək iPhone üçün USB-C şarj portunu sınaqdan keçirdiyi bildirilir. Baxmayaraq ki, bu texnologiyanın 2023-cü ildə, yoxsa 2024-cü ildə istifadəyə veriləcəyi hələlik məlum deyil. Avropanın bu addımını dəstəkləyənlərlə yanaşı, əleyhinə olanlar da var. Bir çox insan USB-C qərarına görə başqa yeni nəsil qoşulma standartlarının da mənfi təsirlənəcəyini düşünür. Elə Apple da qərarın bu sahədə innovasiyalara xələl gətirəcəyinə inanır. Amerika yeni standartı qəbul etsə şirkətin lightning kabelindən imtina etməsi daha da sürətlənəcək. Nəticədə şirkət nəinki USB-C standartına keçmək, fiziki kabel girişini ümumiyyətlə ləğv edərək naqilsiz texnologiyaların istifadəsini başlada bilər.
