Apple şirkəti son dövrlərdə süni intellekt nəhəngi hesab olunan OpenAI ilə danışıqlar aparır. Belə ki, texnologiya nəhəngi iOS 18 yenilənməsi ilə iPhone modellərinə gələcək süni intellekt xüsusiyyətləri ilə bağlı yeniliklər etməyə davam edir. Bloomberg mənbəsindən verilən məlumata görə, Apple ChatGPT xüsusiyyətlərini Siri üçün əlçatan etmək niyyətindədir. İki şirkət arasındakı danışıqlar da artıq razılaşma mərhələsinə çox yaxındır.
Bloomberg-in məlumatına görə, Apple həm OpenAI, həm də Google ilə süni intellekt modellərini müzakirə etdikdən sonra OpenAI ilə işləmək qərarına gəlib. ABŞ mərkəzli texnologiya nəhəngi iOS 18 ilə Siri-yə gətirəcəyi süni intellekt imkanları üçün ChatGPT-dən faydalanmaq istəyir. Beləliklə, gələn ay baş tutacaq WWDC tədbirində hər iki şirkətin ortaq layihəsini görə bilərik. Siri indi ChatGPT xüsusiyyətlərinə sahib olacaq.
Mark Gurmanın sözlərinə görə, OpenAI ilə yenidən danışıqlar nəticəsində Apple şirkətin süni intellekt texnologiyasından iPhone 16 seriyasında istifadə etmək qərarına gəlib. O cümlədən, iki şirkət arasındakı ortaqlıq tezliklə elan edilə bilər. Maraqlısı budur ki, bu xəbər, Apple-ın Gemini-ni müxtəlif iPhone xidmətləri üçün lisenziyalaşdırmaq üçün Google ilə danışıqlar apardığı xəbərindən qısa müddət sonra gəldi. Gurman iddia edir ki, Apple şirkəti Google ilə razılığa gələ bilməyib, lakin yenə də onlar arasındakı əlaqələr tamamilə kəsilməyib. Bundan əlavə qeyd edək ki, iOS 18 yeniləməsi iyunun 10-da başlayacaq WWDC tədbirində elan ediləcək. Apple-ın OpenAI ilə razılığa gəlməsi ilə biz iMessage, FaceTime və əlbəttə ki, Siri kimi məşhur iOS funksiyalarına inteqrasiya olunmuş ChatGPT imkanlarını görə bilərik.
