Beləliklə, Google rəqibi olan axtarış nəhəngi Yandex öz varlıqlarını milyardlarla dollarlıq razılaşma ilə ruslara satıb. Belə ki, şirkətin yaydığı məlumata əsasən Nasdaq-a daxil olan Yandex NV, Rusiyadakı bütün aktivlərini 475 milyard rubla və ya 5.21 milyard dollara rusiyalı investorlar konsorsiumuna və neft nəhəngi Lukoil-ə məxsus fonda satıb. Habelə müqavilə çərçivəsində şirkət ödənişi həm nəğd pul həm də, səhm əsasında edib.
Artıq Rusiyanın Google-u olaraq adlandırılan Yandex sözün əsl mənasında elə Rusiyanın tam mülkiyyətinə keçir. Ümumiyyətlə Yandex, axtarış, reklam və xəritə xidmətləri də daxil olmaqla aparıcı onlayn xidmətləri inkişaf etdirib və 2022-ci ilin fevralına qədər yəni Rusiya-Ukrayna müharibəsi başlayana qədər qlobal biznesə çevrilmək potensialına malik azsaylı Rusiya şirkətlərindən biri kimi görünürdü. Lakin Kreml, Yandex-in Rusiyadakı bizneslərini Hollandiyalı ana şirkət olan Yandex NV-dən ayırmaq üçün 18 aydır ki, danışıqlar aparırdı.
Yandex NV müharibə başlayandan bəri Rusiyadan ən böyük korporativ çıxışlardan birini etdi deyə bilərik. Lakin gəlirlərin 95%-dən çoxunu təşkil edən Yandex biznesləri hələ də Rusiyada qalacaq və rusların nəzarəti altına keçəcək. Yandex NV hələ satış qiymətinin ədalətli dəyərdən 50% az olduğunu da bildirib. Qeyd edək ki, şirkətin alıcıları arasında Leta Capital vençur fondunun təsisçisi Alexander Chachava, Infinitum anbarının rəhbəri Pavel Prass, LUKOIL Group və sahibkar Aleksandr Ryazanov yer alıb.
Müqaviləyə görə bu il 31 iyul tarixinədək, Rusiyadakı bütün Yandex bizneslərində Yandex NV adı dəyişdirilməlidir və Yandex brendlərindən istifadə də dayandırılmalıdır. Bununla belə, ruslar tərəfindən alınan şirkət 2024-cü ilin sonuna qədər Yandex-in bəzi texnologiyalarından istifadə etmək hüququna malik olacaq.
