Çin texnologiya nəhəngi Xiaomi, illərdir üzərində işlədiyi fərdi çipset layihəsi üçün mühüm mərhələyə çatıb. Belə ki, Xiaomi-nin Xring adlı öz prosessoru üzərində işləyən komandanın hazırda 1000 işçi heyəti var. Bundan əlavə, bu çip təşəbbüsü Xiaomi damı altında deyil, tamamilə müstəqil bir şirkət daxilində həyata keçirilir. Bu addımın ABŞ-ın mümkün sanksiyalarından qaçmaq məqsədi daşıdığı iddia edilir.
Bildirilir ki, Xring layihəsinin rəhbəri əvvəllər Qualcomm-da baş direktor vəzifəsində çalışmış icraçıdır. X platformasından sızdırılan məlumata görə , çipin işləyən prototipi mart ayında müşahidə edilib və strukturu son məhsula çox yaxındır. Xring təşəbbüsünün Xiaomi-dən müstəqil bir şirkət kimi yenidən qurulması texnologiya dairələrində diqqətəlayiq strateji addım hesab olunur. Bu qərarın əsasının Çin texnologiya şirkətlərinə tətbiq edilən ABŞ mənşəli ticarət məhdudiyyətləri olduğu düşünülür. Yadınızdadırsa, oxşar proses əvvəllər Huawei üçün də tətbiq edilmişdi və şirkət ABŞ texnologiyalarına çıxışının böyük hissəsini itirmişdi.
Xiaomi-nin oxşar aqibətdən qaçmaq üçün Xring-i öz brendindən ayrı yerləşdirmək qərarı gələcəkdə digər Çin istehsalçılarına nümunə ola bilər. Bununla belə, keçən il Xiaomi-nin 3nm istehsal prosesində uğurla “tap-out” mərhələsinə keçdiyi, yəni dizaynın tamamlandığı və fiziki istehsalın başlaya biləcəyi bildirilib. Layihənin rəsmi olaraq may ayında təqdim edilməsi planlaşdırılır. Lakin daxili mənbələrdən verilən məlumata görə, prosesin təxirə salınması ehtimalı var. Bunun əsas səbəbi xərcləri azaltmaq üçün şirkət tərəfindən həyata keçirilən bəzi aqressiv qənaət strategiyaları və əməliyyat problemləri kimi göstərilir. Xiaomi-dən hələ ki, rəsmi açıqlama verilməyib, lakin bu addım mobil prosessor bazarında köklü dəyişiklikdən xəbər verə bilər.
