Xatırlayırsınızsa, bu ilin əvvəli Huawei və Xiaomi arasında patent mübahisəsi yaranmışdı. İndi isə Çin nəhəngləri bu mübahisəni 5G və digər informasiya texnologiyalarını əhatə edən çarpaz lisenziya müqaviləsi imzalamaqla həll edirlər. Huawei və Xiaomi mübahisəni kənara qoyaraq bir-birlərinin patentlərindən qarşılıqlı istifadə haqqında müqavilə imzalayıblar.
Beləliklə, iki şirkət arasında patent lisenziyası mübahisəsi kökündən həll olunur. Çin texnologiya nəhəngləri arasında çarpaz patentli lisenziya müqaviləsi 5G də daxil olmaqla bir çox kommunikasiya texnologiyalarını əhatə edir. Bu da şirkətlər arasında ciddi bir əməkdaşlıq kimi qiymətləndirilir. Çünki, əksər hallarda 5G patentləri əhəmiyyətli dərəcədə baha və bəzən yüksək məbləğlər qarşılığında belə istifadəsi mümkün olmayan lisenziyalar kimi qiymətləndirilirlər.
“Huawei” şirkətinin əqli mülkiyyət departamentinin rəhbəri Alan Fan deyib: “Biz Xiaomi ilə bu lisenziya müqaviləsini imzalamaqdan məmnunuq. Bu lisenziya müqaviləsi bir daha sənayenin Huawei-nin rabitə standartlarına verdiyi töhfələrin tanınmasını əks etdirir və gələcəyin tədqiqinə investisiyalarımızı artırmağa kömək edəcək.”
Xiaomi şirkətinin korporativ biznesin inkişafı üzrə baş meneceri Ran Xu isə bildirir ki: “Biz Huawei ilə patentlərarası çarpaz lisenziya sazişi əldə etməkdən məmnunuq. Bu, hər iki tərəfin bir-birinin əqli mülkiyyət hüquqlarını tanıdığını və hörmət etdiyini göstərir. Xiaomi, həmişə olduğu kimi, mülkiyyətə hörmətlə yanaşacaq. Bu da daha çox insanın texnologiyadan faydalanmasına imkan verəcək.”
Martda Huawei, Çinli rəqibini özünə məxsus dörd patenti pozduğuna görə məhkəməyə verdi. Çində açılan iddiadan sonra açıqlama verən Xiaomi, hər iki tərəfin patent lisenziyası üçün danışıqlar masasında olduğunu bildirmişdi.
