Twitter platformasının yeni versiyası olan X artıq tamamilə fərqli yeniliklərə sahib olacaq. Görünən odur ki, Elon Musk platformanın sadəcə adını dəyişdirməklə yetinməyib. Beləliklə Elon Musk X platformasında yaxında video və səsli zənglər funksiyasının əlçatan olacağı barədə öz profilində məlumat yayıb. Əslində platformaya bu yeniliyin gələcəyi uzunmüddətdir ki, gündəmdə idi. Bu gün isə Elonun açıqlaması iddiaları aydınlaşdırıb.
Elon Musk bildirib ki, X platformasında çox yaxında həm iOS, həm Android, həm də Mac və PC-də işləyəcək video və səsli zənglər funksiyası əlçatan olacaq. Ümumiyyətlə Elon X platformasını tamamilə fərqli etməyə çalışır. Bu platforma həm əyləncə həm rabitə həm də iş üçün istifadə ediləcək. Hətta ötən günlərdə platformada iş elanları üçün xüsusi bölmənin hazırlanacağı barədə məlumat ortaya çıxmışdı. Elon linkedin, whatsapp, instagram kimi platformaları sadəcə 1 ünvanda toplamağa çalışır.
Qeyd edək ki, X platformasına əlavə ediləcək bu xüsusiyyət hərkəs üçün əlçatan olacaq. Lakin hələlik funksiyanın nə zaman istifadəyə veriləcəyi açıqlanmayıb. Elon Muskın paylaşımına əsasən deyə bilərik ki, funksiya artıq hazırdır və çox yaxında istifadəçilərə təqdim ediləcək. Gələcəkdə isə X platforması PayPal rəqibi ola bilər. Burada istifadəçilər bir-birlərinə rahatlıqla pul göndərə biləcək. Artıq Elon bu məqsədə çatmaq üçün maliyyə sektorundan bir çox insan və qurum ilə danışıqlar aparıb. Çox güman ki, hansısa maliyyə qurumu bu iddianın reallaşması üçün X ilə əməkdaşlıq edəcək. Üstəlik ən son açıqlana məlumata görə X şirkəti sizin biometrik məlumatlarınızı da toplamağa başlayacaq. Yəni, barmaq izi başda olmaqla identifikasiya üçün bütün məlumatlar şirkət tərəfindən işlənəcək.
