Dünyanın ən çox istifadə edilən mesajlaşma platformalarından biri olan WhatsApp indi yaxınlıqda olan insanlarla fayl paylaşmaq üçün yeni funksiya gətirir. Belə ki, WABetaInfo mənbəsinin məlumatına görə sadəcə yaxınlıqda olan insanları əhatə edəcək yeni fayl paylaşma infrastrukturu artıq demək olar ki, hazırdır. Hal-hazırda beta test mərhələsində olan bu funksiya qarşılıqlı təsdiq əsasında kontaktınızda olan insanlarla fayl paylaşmağınıza imkan verəcək. Yəni WhatsApp təhlükəsizliyi nəzərə alaraq təsadüfi olaraq yaxınlıqda olan hərkəsin bir-birinə fayl göndərməsinin qarşısını alacaq.
Təbii ki, bəziləri üçün bu funksiya elə də təəccüblü deyil. Çünki, fayl paylaşmaq funksiyası WhatsApp platformasında uzun müddətdir mövcuddur. Lakin yeni funksiya ilə fayl paylaşmaq daha da asanlaşır. İndi kontaktınızda axtarış etmədən yaxınlıqdakı dostunuzla faylınızı sadə şəkildə paylaşa biləcəksiniz. Bu funksiyadan istifadə etmək üçün isə əvvəlcə yaxınlıqdakı insanlar bölməsi açılmalıdır. Daha sonra isə hər iki istifadəçiyə sorğu göndəriləcək. Məhz bu sorğular təsdiqləndikdən sonra isə fayl paylaşmaq üçün demək olar heç bir maneə olmayacaq.
Bəzi hallarda istifdaçilərin köməyinə çatacaq bu funksiya hazırda Android-də beta sınaq mərhələsindədir. Məhz bu səbəbdən də yeni infrastrukturun iOS-a gəlib-gəlməyəcəyi məlum deyil. Xatırladaq ki, WhatsApp daha əvvəl kanallar adlı yeni funksiyasını təqdim etmişdi. İndi isə kanal adminləri və ya sahibləri artıq kanal üzvlərinə səsli mesaj göndərə biləcək. Habelə WhatsApp indi kanallara 16 fərqli admin təyin edilməsinə icazə verir.
