WhatsApp yeniliklər etməyə davam edir. Belə ki, indi də bir neçə smartfonda eyni WhatsApp hesabı istifadə etmək mümkün olacaq. Bu barədə şirkətin rəsmi blog səhifəsində məlumat verilib. Qeyd edək ki, şirkət daha əvvəl istifadəçilərə bütün cihazlarda təhlükəsiz şəkildə mesajlaşma imkanı verirdi. İndi isə istifadəçilər təhlükəsiz olaraq bir neçə smartfonda eyni hesabdan istifadə edə biləcəklər. Qısa müddət əvvəl şirkət WhatsApp Web-in artıq smartfonlardan asılı olmadan fəaliyyət göstərdiyini elan etmişdi. Şirkət qeyd edir ki, artıq eyni anda həm veb brauzerlər, həm smartfonlar, həm planşetlər həm də kompüterlərdə bir WhatsApp hesabı ilə mesajlaşmaq mümkün olacaq. Beləliklə yeni funksiya ilə hesabınızı 4 cihazda aça bilərsiniz.
Qeyd edək ki, bir neçə gün öncə WhatsApp şirkətinin Lottie kitabxanasından istifadə edərək animasiya emojiləri hazırladığı ortaya çıxmışdı. İndi isə şirkət bir neçə smartfonda eyni WhatsApp hesabı istifadə edilməsinə imkan yaradılacağını xəbər verir. Belə ki, bu yenilik əsasən kiçik biznes ilə məşğul olan şirkətlər üçün əlverişli olacaq. Çünki, şirkətin biznes hesabı artıq bir neçə işçi tərəfindən eyni vaxtda istifadə oluna biləcək.
Bildirmək lazımdı ki, yeni funksiya yaxın həftələrdə təqdim ediləcək. Bir neçə smartfona eyni WhatsApp hesabı əlavə etmək üçün WhatsApp vebdə olduğu kimi birdəfəlik kod və ya qr koddan istifadə edə bilərsiniz. Lakin WhatsApp əlavə üsullar da təklif edə bilər. Yaxın günlərdə rəsmi olaraq qoşulma qaydaları və daha detallı məlumat da bildiriləcək.
