Hələ 2024-cü ilə daxil olmamış gələn il qarşılaşacağımız yeniliklər barədə məlumatlar ortaya çıxır. Belə ki, uzun müddətdir gündəmdə olan Volocopter gələn il keçiriləcək Paris Olimpiadasında elektrikli aerotaksi xidmətinə başlayacaq. Ümumiyyətlə bir çox şirkət kommersiya məqsədi ilə istifadə olunacaq uçan taksi xidmətlərini işə salmağa hazırlaşır. Görünən odur ki, 2023-cü il yalnız süni intellekt tərəfində deyil, həm də uçan taksi tərəfində əhəmiyyətli inkişafa səbəb olub.
Hazırda uçan taksi xidmətlərinin dəyəri və təhlükəsizliyi əsas diqqət mərkəzində olsa da, texnologiya nəhəngləri öz araşdırmalarına ara vermədən davam edir. Belə ki, aerotaksi xidməti bazarındakı ilk şirkətlərdən biri də Volocopter olacaq. Şirkət elektrikli aerotaksi xidmətini ilk olaraq 2024-cü ildə keçiriləcək Paris Yay Olimpiya oyunlarında işə salmaq üçün hazırlıqlara da başlayıb. Hətta şirkət Paris havalimanı ilə olimpiya oyunlarının keçiriləcəyi əraziyə bir neçə marşrut təyin etməyə hazırlaşır.
Aparılan sınaqlar nəticəsində məlum olub ki, uçan taksilər artıq böyük şəhərlərdə və beynəlxalq hava limanlarında maneəsiz fəaliyyət göstərə bilər. Qeyd edək ki, hazırda dünyanın müxtəlif bölgələrindən olan texnologiya nəhəngləri diqqətlərini məhz uçan taksilərə, daha doğrusu uçan taksi bazarında yönəldiblər. Hətta ABŞ Federal Aviasiya Administrasiyası (FAA) 2028-ci ilə qədər qısamüddətli marşrutlarda uçan taksilərin işə salınması üçün təkliflər hazırlayıb.
