Çinin 36 Krypton nəşrinin məlumatına görə, Çinin BBK qrupu daxilində smartfon markası Vivo, xərcləri azaltmaq və səmərəliliyi artırmaq üçün sub-brendi olan iQOO-nu əsas biznesinə inteqrasiya etməyi planlaşdırır. İki şirkət artıq R&D (araşdırma/tədqiqat) imkanlarını, kanal sistemini, təchizat zəncirini və daha çoxunu paylaşır. Lakin qeyd etmək lazmıdır ki, brendlərin planlaşdırma, istifadəçi əməliyyatı, media strategiyası, və e-ticarətdə fərqli yanaşmaları var idi.
Vivo-dan yaxın mənbələrə istinadən xəbərdə deyilir ki, Vivo-nun yüksək səviyyəli rəhbərləri brendlər və media strategiyaları komandaların birləşməsindən danışıblar. Bu o deməkdir ki, iQOO-nun artıq öz mağazaları olmaya bilər. iQOO-nun ayrıca biznes bölməsi olub-olmayacağı hələlik bəlli deyil. Keçmiş iQOO əməkdaşları ilə söhbətlərə əsaslanaraq hesabatda bildirilir ki, iki qrup tamamilə ayrı istifadəçi dalğaları üzərində işləyir. Bununla belə, Vivo-nun əyalət agentliyi strukturunun bir hissəsi olmaqla yanaşı, hər bir iQOO mağazası müstəqil şəkildə fəaliyyət göstərir.
Şirkətin keçmiş əməkdaşı bu sözləridə əlavə edib: “Daxili müdirlər hələ də mübarizə aparırlar. Gələcəkdə iQOO-nun hansı mövqe tutacağı və komandanı necə inteqrasiya edəcəyi hələ də qeyri-müəyyəndir” Hesabatda qeyd edilib ki, Vivo bu məsələ ilə bağlı hələ cavab verməyib. iQOO 2019-cu ildə Çində təqdim edildikdən sonra 2020-ci ilin fevralında Hindistanda təqdim edilib. O vaxtdan bəri iQOO Hindistanda və qlobal bazarlarda bir sıra yüksək və orta səviyyəli smartfonlar buraxıb. iQOO-nun smartfonları ən yaxşı performansa və ən yaxşı oyun təcrübəsinə malik idi.
Eyni prinsip BBK daxilində Oppo və OnePlus arasında da müşahidə olunur!
Oppo şirkəti hal-hazırda çox qəribə bir strategiya planlaşdırırmış kimi görünür. Bundan əvvəl qlobal bazarda çıxan OnePlus Pad modeli, ötən təqdimatda Çin üçün Oppo Pad adında çıxarıldı. İndi isə “OPPO PHN110” kod adlı qatlana bilən smartfonun, qlobal bazarda “OnePlus Fold” şərti adlı cihaz kimi hazırlıq mərhələsində olduğu görülür. Yəni, ortada qəribə bir aslılıq var. Oppo şirkəti heç bir açıqlama vermədən istehsal etdiyi cihazları qlobal bazarda OnePlus kimi göstərməyə başlayıb. İnsayderlərə görə, bu strategiyanın arxasında təxmin etdiyiniz şey durur.
Oppo, böyük bir ehtimalla qlobal bazarda OnePlus brendinin populyarlığı ilə brendi özünün qlobal bazardakı yeni adına çevirməyi düşünür. Yəni, ehtimallara görə Oppo şirkəti yavaş-yavaş məhsullarını Çində öz adı altında, qlobal bazarda isə OnePlus adı altında satmağı yoxlayacaq. Digər bir qəribəlik isə Find X6 Pro ilə bağlıdır. Smartfon yalnız Çin nəzərdə tutulub, üstəlik qlobal bazara çıxarılması ilə bağlı heç bir açıqlama verilməyib. Lakin qlobal bazarda smartfon bir çox media və şəxsə icmal üçün göndərilib. Ortaya bir sual çıxır. Şirkət qlobal bazara çıxarmayacağı smartfon üçün niyə qlobal bazarda PR ilə məşğuldur?
İlkin ehtimallar Find seriyasının qlobal bazarda OnePlus Find istiqamətində olacağı ilə bağlıdır. Lakin mövzunun dəqiqliyi növbəti aylarda bəlli olmağa başlayacaq.
