Bugün elektrikli avtomobillər dünyada əhəmiyyətli səviyyədə artır. Belə ki, həm Avropa, həm Çin, həm də ABŞ-da elektrikli avtomobil satışları son illərdə ən yüksək səviyyəyə çatmışdır. Təbii ki, elektromobillərin sayının artması dünyada yeni elektrik stansiyalarının da qurulmasına ehtiyac yaradır. Məhz bu məqsədlə Tesla Kaliforniyada dünyanın ən böyük Supercharger stansiyasını quracaq. Qeyd edək ki, 250 kVt gücündə 164 enerji doldurma qurğusuna sahib olacaq bu elektrik stansiyası böyük ölçüdə Kaliforniyadakı elektromobil istifadəçilərinin ehtiyacını qarşılayacaq.
Kaliforniyada Tesla şirkəti tərəfindən qurulacaq dünyanın ən böyük Supercharger stansiyasında həmçinin qoşqulu avtomobillər də rahatlıqla şarj ola biləcək. Hətta bu məqsədlə stansiyada 16 böyük enerji doldurma qurğusu quraşdırılacaq. Stansiyanın dayanacaq sahəsinin üstü günəş panelləri ilə örtüləcək və Megapack batareya paketləri inteqrasiya ediləcək əsas şəbəkədən asılı olmayan bir mikro şəbəkə də yaradılacaq. Bu yolla isə batareyalardan pik saatlardakı intensiv tələbatı qarşılayaraq enerji xərclərini azaltmaq planlaşdırılır.
Bundan əlavə, stansiyada yerləşdiriləcək Starlink terminalları ilə yüksək sürətli internet bağlantısı təmin ediləcək. Görünən odur ki, Tesla yeni Supercharger stansiyalarına olduqca önəm verir və müştəriləri bütün xidmətlər ilə təmin etmək istəyir. Qeyd edək kki, hələlik 250 kVt ilə məhdudlaşdırılacaq şarj qurğuları 350 kVt və ya daha çox sürətə çata bilən yeni nəsil Supercharger V4 aqreqatlarından ibarət olacaq.
