Tesla-nın Gigafactory Berlin müəssisəsi açıldığı gündən etibarən, Alamniyadakı ekoloji qrupların tənqid və əks reaksiyasının mərkəzində olub. Belə ki, müəssisənin çox su sərf etdiyi üçün meşələrin məhvinə və su ehtiyatlarına təzyiq göstərdiyi iddia edilirdi. İndi Tesla-nın Almaniyadakı Gigafactory Berlin müəssisəsində cari su istifadəsi və ətraf mühit göstəriciləri ilə bağlı yeni məlumatlar yayımlanıb. Maraqlısı budur ki, Tesla avtomobil başına ən az su sərf edən şirkətlərdən biri olaraq hər kəsi təəccübləndirib.
Əvvəlcə planlaşdırıldığından əhəmiyyətli dərəcədə az su istehlak etdiyinə görə şirkət illik 377.000 kubmetr su istifadə hüququnu Strausberg-Erkner Su Assosiasiyasına qaytarıb. 2024-cü ildə fabrikin ümumi su sərfi 456 min kubmetr olub. Bu, bir avtomobil üçün 2,16 kubmetr su sərfi deməkdir. Avtomobil sənayesində orta istehlak 2,84 ilə 3,5 kubmetr arasında olduğu üçün Tesla-nın istehlak nisbəti sənaye standartlarından xeyli aşağı düşüb. Bundan əlavə, Gigafactory Berlin bu yaxınlarda Avropa Ətraf Mühitin İdarəetmə və Audit Sistemi (EMAS) sertifikatına layiq görülüb. Bu sertifikat fabrikin cari ətraf mühit tədbirlərini və davamlı təkmilləşdirmə öhdəliyini tanıyır. Zavod meneceri Andre Thierig, bu günə qədər 2 milyondan çox ağac əkdiyini və ilin sonuna qədər fabrikin damlarında əlavə 5-15 MVt günəş paneli gücünə nail olmağı hədəflədiklərini bildirib.
2024-cü ildə fabrikin ümumi enerji istehlakı 419.000 MVt/saat olub. Elektrik enerjisi ən böyük paya sahib olsa da, tullantıların istiliyini bərpa etməklə təbii qazdan istifadəni azaltmaq üçün səylər göstərilir. Obyekt həmçinin bu il istehsalatda istifadə olunan tullantı sularının 90 faizini təkrar emal etməyi qarşısına məqsəd qoyub. Gigafactory Berlin hazırda təxminən 11.000 işçi çalışır və orta illik istehsal gücü 250.000 avtomobildir.
