Elektrikli avtomobil sənayesinin nəhənglərindən olan Tesla Almaniyadakı fabrikində istehsalı növbəti dəfə dayandırmalı olub. Belə ki, Avropa bazarı üçün böyük əhəmiyyət daşıyan Berlin şəhərindəki fabrik elektrik enerjisi olmadığı üçün fasilə verib. Maraqlısı budur ki, fabrikdə baş verən bu hadisənin təxribat olduğu düşünülür.
İddialara görə, şirkətin yaxınlığındakı elektrik xəttində yanğın törədilib, lakin yanğın qısa müddətdə söndürüldüyü üçün fabrikə zərər gəlməyib. Mümkün risklərə qarşı fabrikini təxliyə edən Tesla bu yaxınlarda Almaniyadakı fabrikində istehsalı dayandırmalı oldu. Ümumiyyətlə, son bir neçə həftə Teslanın Avropadakı yeganə fabriki olan Gigafactory Berlin üçün çətin keçdi. Birincisi, Yəməndəki vətəndaş müharibəsi səbəbindən yük gəmilərinin Ədən körfəzi və Bab əl-Məndəb boğazında yaşadığı problemlər sayəsində tədarük problemləri yarandığı üçün indi isə təxribat nəticəsində törədilən yanğın.
Həmçinin, Tesla Gigafactory Berlin-in yerləşdiyi Grünheide bələdiyyəsinin yerli sakinləri 100 hektardan çox meşə sahəsinin təmizlənməsini tələb edən fabrikin genişləndirilməsi layihəsinin əleyhinə səs verdilər. Bundan əlavə, ətraf mühit fəalları genişlənməni dayandırmağa çalışmaq üçün keçən həftə fabrikin kənarındakı meşədə düşərgə qurublar. DW-nin məlumatına görə isə ən son baş verən hadisədə naməlum şəxslər çərşənbə axşamı səhər tezdən Steinfurt və Hartmannsdorf arasındakı yüksək gərginlikli dirəyi yandırıb və nəticədə Berlindəki Gigafactory daxil olmaqla, təxminən 2000 insan işıqsız qalıb. Qeyd edək ki, Tesla Berlindəki Gigafactory-də dünyanın ən çox satılan avtomobilləri siyahısında birinci olan Model Y istehsal edir.
