Beləliklə, bir dövrün sonu gəlib çatdı, Nvidia GeForce GTX 16 seriyalı qrafik kartların istehsalı rəsmi olaraq dayandırıldı. Nvidia uzun illərdir istifadə edilən GTX qrafik kartlarını istehsal etməyəcək. Ailənin sonuncu üzvü olan GTX 16 da rəsmi olaraq tarixin tozlu səhifələrində qalır. Nvidia bundan sonra yalnız daha yüksək performans və süni intellekt texnologiyaları ilə təchiz edilən RTX seriyası ilə yoluna davam edir.
Bildiyiniz kimi, Nvidia ən son RTX 40 seriyası da daxil olmaqda çoxlu qrafik kartlara sahibdir. Ancaq yeni seriyalar təqdim olunduqca bütün sahələrdə olduğu kimi, Nvidia şirkəti də köhnə seriyalı qrafik kartlarının istehsalını dayandırır və onlara verdiyi dəstəyi kəsir. Belə ki, Nvidia son olaraq GeForce GTX 16 seriyalı GTX 1650 və GTX 1630 qrafik kartların istehsalını dayandırıb. Xatırlayanlar olacaq, daha əvvəl Nvidia 2024-cü ilin birinci rübündən etibarən GeForce GTX 16 seriyasının istehsalını dayandıracağını açıqlamışdı. Son məlumata görə, GTX qrafik kartları hazırkı ehtiyatlar tükənənə qədər rəflərdə qalacaq. Yəni istifadəçilər hələ də vitrində qalan qrafik kartları əldə edə biləcəklər. Bununla belə, bu müddət ərzində biznes tərəfdaşlarına, pərakəndə satıcılara və distribyutorlara yeni tədarüklər olmayacaq.
Qeyd edək ki, istehsalı dayandırılan vidia Turing mikroarxitekturasına əsaslanan GTX 16 seriyası ilk dəfə 2019-cu ildə təqdim edilmişdi. Məhz o gündən bu yana bu qrafik kartlar RTX seriyasına büdcə yönümlü bir alternativ olmuşdu. Bununla belə, yeni xəbər heç də təəccüblü deyil. Ampere, yəni RTX 30 seriyasına edilən endirimlər səbəbindən GTX seriyası böyük ölçüdə geridə qaldı. Artıq milyonlarla istifadəçi RTX seriyasına keçid edib. Hətta Steam platformasının məlumatlarına görə də, bir vaxtlar ən çox istifadə edilən GTX 1650 qrafik kartı öz yerini RTX 3060-a buraxıb.
