Bir müddət əvvəl xəbər vermişdik ki, texnologiya dünyasının ən innovativ cihazlarından olan SSD-lər bahalaşacaq. İndi isə SSD-lərdən sonra bazarda uzun müddətdir mövcud olan sərt disk qiymətləri də artır. Belə ki, məşhur sərt disk istehsalçıları Western Digital və Seagate, bununla bağlı açıqlama edib. Texnologiya nəhəngləri sərt disklər və SSD-lərdə geniş miqyaslı qiymət artımının olacağı barədə xəbərdarlıq edib. Qiymət artımına səbəb kimi istehsalın aşağı olması və tələbatın artması göstərilir.
Qeyd edək ki, Western Digital və Seagate şirkətləri sərt disk qiymətləri ilə bağlı olan xəbəri ilk olaraq pərakəndə partnyorlarına göndərdikləri məktubda bildiriblər. Bəs gəlin görək qiymət artımına zəmin yaradan səbəblər nədir? Trendforce tərəfindən açıqlanan məktubda Seagate bildirir ki, əvvəlki tələb səviyyələrinə qayıdış, aşağı istehsal gücü səbəbindən müştəri tələblərini ödəyə bilməmək və inflyasiya səbəbindən artan xərclər qiymət artımında əsas amillərdir. Şirkət həmçinin müştərilərə növbəti rüblərdə əlavə qiymət artımlarının olacağı barədə xəbərdarlıq edir.
Bundan əlavə, bir həftə əvvəl Western Digital müştərilərinə oxşar məktub göndərib. Seagate-in qiymətləri artıracağına dair açıqlaması yaddaş cihazlarını çoxdandır almaq istəyənlər üçün heç də təəccüblu hesab olunmur. Çünki, bununla bağlı məlumatları artıq neçə aydır kı, sosial şəbəkələrdə mövcuddur. Ümumiyyətlə, Tayvan zəlzələsi, süni intellektin artan tələbi və tədarük zəncirindəki fasilələr kimi səbəblərə görə istehsalçılar itirilmiş gəlirlərini bərpa etmək üçün qiymətləri artırmağa meyllidirlər.
