Kompüter texnologiyasında yeni bir dövr yaradan texnologiya hesab olunan SSD-lər gələn ildən etibarən kompüterlərin və noutbukların qiymətini artıra bilər. Belə ki, bəzi sənaye analitiklərinə görə SSD və NAND yaddaş texnologiyalarının qiymətləri 2024-cü ildə 55%-ə qədər arta bilər. Hətta bəzi istehsalçılar dekabr ayından etibarən qiymətləri qaldırmağa da başlayıb.
Ümumiyyətlə SSD satışları artıq bir neçə rübdür ki, azalır. 2021-ci ildə meydana gələn çatışmazlıqlardan sonra SSD tədarükü artsa da, istehlakçıların tələbinin azalması nəticəsində bu sahədə əhəmiyyətli dərəcədə gəlir itkisi meydana gəlib. SSD istehsalçılarının gəlirləri əhəmiyyətli dərəcədə azalıb və hətta bəziləri iflasa qədər gəlib. Lakin indi SSD istehsalçıları qiymətləri artırmaqla və stokları yenidən doldurmaqla gəlirlərini artırmağı hədəfləyirlər. Bu istehsalçılardan biri də SSD istehsalı üzrə ixtisaslaşan Phison şirkətidir.
Phison yayımladığı hesabatda bildirib ki, SSD qiymətləri gələn ildən etibarən arta bilər. O cümlədən hesabatda SSD tədarüklərinin son dövrlərdə 40% artdığı da bildirilib. Western Digital da həmçinin müştərilərinə gələcəkdə NAND qiymətlərində 55%-ə qədər artımların olacağını bildirib. Samsung və SK Hynix kimi brendləri isə artıq yaddaş cihazlarının qiymətini artırıb. Bu qiymət artımlarının isə tezliklə kompüter bazarına təsir edəcəyi də qaçınılmazdır. Odur ki, əgər kompüter və ya noutbukunuzun SSD-ni dəyişmək fikrindəsinizsə, bunu yeni ilə başlamadan edin.
