Qualcomm şirkəti yeni Snapdragon 8 gen 3 çipseti və X Elite prosessorları ilə yetinməyib daha bir yenilik edəcək. Belə ki, şirkətin yeni flaqman çipseti Snapdragon 8 Gen 4 Oryon nüvəsinə sahib ilk smartfon çipseti olacaq. Görünən odur ki, yeni smartfon çipseti artıq prosessorlarla rəqabət apara biləcək. Ümumiyyətlə Qualcomm ötən günlərdə iddialı Oryon nüvəsini X Elite prosessorunda elan etmişdi. Məhz bu məqam da isə bu Oryon dizaynlı nüvələrin smartfon çipsetlərində nə zaman istifadə olunacağı sualı yaranmışdı.
Qualcomm şirkəti meydana gələn suala cavab olaraq bildirib ki, Snapdragon 8 Gen 4 Oryon nüvəsinə sahib ilk smartfon çipseti olacaq. Beləliklə 2024-cü ildə qarşımıza tamamilə yeni arxitekturaya əsaslanan mobil çipset çıxacaq. Qeyd edək ki, yeni təqdim edilən flaqman Snapdragon 8 gen 3 çipseti hələ də ARM nüvələrinə sahib olub. İndi isə şirkət 2016-ci ildən sonra ilk dəfə xüsusi çipset nüvələrinə keçid edəcək. Bu dəfə Qualcomm iPhone modellərinə rəqib olacaq və mübarizə apara biləcək çox iddialı smartfonlara güc verəcək mobil çipset təqdim edəcək.
Əlavə olaraq qeyd edək ki, Qualcomm şirkəti ötən gecə başlayan Snapdragon Summit tədbiri timsalında Snapdragon 8 Gen 3 çipseti və X Elite prosessorunu təqdim edib. Yeni nəsil Qualcomm məhsulları əhəmiyyətli səviyyədə performans artımı gətirərkən, eyni zamanda bir çox innovativ imkanları ilə də fərqlənirlər. Məsələn, Qualcomm bu prosessorların süni intellekt mühərrikinin multimodal yaradıcı süni intellekt modellərlə uyğun olacağını bildirdi. Qualcomm iddia edir ki, bir saniyədən az müddətdə şəkilləri göstərə bilən dünyanın ən sürətli Stable Diffusion sisteminə malikdir.
