Stellantis bu dəfə 1 milyard dollar məbləğində sərmayə ilə Çinli elektromobil nəhəngi Leapmotor ilə ortaq olub. Belə ki, Bloomberg mənbəsinə görə, Stellantis şirkəti Leapmotora onun 20% payı müqabilində təxminən 1 milyard dollar sərmayə qoyacaq. Daha əvvəl elektrikli nəqliyyat vasitələrinin inkişafı və istehsalı üçün ortaqlıq quracağı iddia edilən Leapmotor və Stellantis, bu sərmayə ilə həm Avropada, həm də Çində əməkdaşlıq edəcək. Xatırladaq ki, ötən həftə Çindəki avtomobil fəaliyyətini tamamilə Dongfeng Motora köçürəcəyi açıqlanan Stellantis, bu nəhəng bazarda Çin şirkətləri ilə rəqabət apara bilməməkdən şikayətlənirdi.
Ümumiyyətlə Leapmotor 2015-ci ildə təhlükəsizlik kamerası və avadanlıqları sənayesində fəaliyyət göstərən qlobal nəhəng Dahua-nın dəstəyi ilə yaradılıb. Belə ki, şirkət müxtəlif bazarlar üçün aerodinamikası ilə seçilən T03, C01 və C10 kimi elektromobillərin istehsalını və satışını həyata keçirir. Əslində çindəki yüksək rəqabət səbəbindən satış rəqəmləri gözlənilənin altında olan Leapmotor-un beynəlxalq çərçivədə genişlənməsini sürətləndirmək istədiyi məlum idi. İndi isə C10 ilə birbaşa Avropa bazarını hədəfləyən Zhejiang mərkəzli şirkət, Stellantis ortaqlığı sayəsində satış və marketinq əməliyyatlarını daha geniş coğrafiyaya genişləndirə biləcək.
Bu investisiya ilə Stellantis münasib qiymətə Peugeot, Citroen, Opel, Jeep və Fiat elektrik avtomobillərini inkişaf etdirəcək və həm Çin, həm də Avropadakı müştərilərə təqdim edəcək. Beləliklə deyə bilərik ki, Stellantis və Leapmotor 1 milyard dollarlıq bu ortaqlıq sözləşməsi ilə gələcəkdə daha çox uğurlara imza atacaq və beynəlxalq bazarda dəyər qazanacaq.
