Samsung uzun müddətdir istifadə etdiyi siyasətini nəhayət dəyişir. Beləliklə, Samsung artıq bundan sonra bəzi smartfonlarında xüsusilə flaqman səviyyəli modellərdə Galaxy sözündən istifadə etməyəcək.
Cənubi Koreyadan gələn bəzi yeni məlumatlara görə, Samsung məşhur “Galaxy” brendini daşıyan Android smartfonları üçün yeni brendinq strategiyası üzərində işləyir. Ümumiyyətlə, Cənubi Koreya mərkəzli texnologiya nəhəngi artıq neçə illərdir ki, Galaxy brendi altında yeni smartfonlar təqdim edir. Hansı ki, bu brend adı altında şikrət həm orta seqmentə, həm də flaqman seqmentə məxsus cihazlar təklif edib. İndi isə şirkət bu strategiyanı dəyişməklə, bəzi smartfonlarında Galaxy sözündən istifadə etməyəcək.
Şirkət xüsusilə flaqman seqmentində olan modellərini onun Galaxy adından başqa bir ad altında təqdim edə bilər. Bu təşəbbüsün məqsədi isə ayrı bir brend adı altında innovativ və yenilikçi cihazları təklif edərək istifadəçilərin diqqətini cəlb etməkdir. Samsung-un qlobal marketinq bölməsinin rəhbəri Lee Young-hee bu ilin əvvəlində verdiyi açıqlamada Galaxy seriyasının həddindən artıq çox modelə sahib olduğunu və istehlakçıların inqilabi yeniliklərdə fərqli bir ad gözlədiklərini bildirmişdi. “Samsung”un yeni brendinq axtarışları, məhz Hyundai brendinin Genesis markası strategiyasına oxşayacaq. Yəni şirkət sırf flaqman modelləri digər modellərindən fərqləndirmək üçün yeni marka axtarışındadır.
