Kamera sensorları üzrə ixtisaslaşan Samsung, bu dəfə daha böyük çılğınlıq edərək 1 düym formatında sensorlar hazırlayır. Ümumiyyətlə bu gün, bir çox smartfonlarda samsung ekranlarından, kameralarından və digər hissələrindən istifadə edildiyi hərkəsə məlumdur. Hətta Apple belə əzəli rəqibinə məxsus ekran panellərindən istifadə etmək məcburiyyətində qalır. Maraqlısı budur ki, Samsung hər keçən gün öz kamera sensorlarını və ekran panellərini daha da təkmilləşdirir. Belə ki, indi texnologiya nəhəngi 1 düymlük kamera sensorları hazırlamaq istəyir.
Beləliklə Samsung gələcək illərdə flaqman cihazlarda istifadə olunması üçün yeni 1 düym ölçüsündə sensorlar hazırlayır. Yəni qısacası deyə bilərik ki, Samsung ISOCELL HW1 və HW2 üçün işlər davam edir. Əslində son dövrlərdə 1 düymlük sensorlar smartfon kameraları üçün populyar olub. Maraqlısı budur ki, bu kamera sensorlarının ölçüsü əslində 1 düymə yaxın olur yəni, tam olaraq 1 düym hesab olunmur. Lakin marketinq strategiyasına uyğun olaraq bu sensorlar 1 düym adı altından istifadəçilərə təqdim olunur. Qeyd edək ki, Samsung ISOCELL seriyası altında hazırlanmış iki yeni sensor gələn il təqdim ediləcək flaqmanlarda görünəcək. Hər iki sensor yəni HW1 və HW2 432MP olsa da, çox kiçik fərqlərə sahib olacaq.
ISOCELL HW1 sensorunun ölçüsü 1/1,05 düym və piksel ölçüsü isə 0,56 mikrondur. ISOCELL HW2 sensoru isə 1/1,07 düym və 0,5 mikron piksel ölçüsü ilə növbəti yerdə gəlir. Həmçinin bu sensorlar 36 pikseli tək pikseldə birləşdirərək çox daha kəskin təsvirlər yaradır. Samsung ISOCELL HW1 və HW2 sensorlarının hansı smartfonlarda istifadə ediləcəyi hələlik məlum deyil, lakin bunun ən tez Galaxy S25 seriyasında olacağı gözlənilir. O cümlədən Galaxy Z Fold 7 üçün 200MP ölçüsündə ISOCELL HP5 sensorunun da hazırlandığı iddia olunur.
