Bildiyimiz kimi, Qualcomm ilin əvvəlində Snapdragon Satellite texnologiyasını elan edərək peyk bağlantısı layihəsi barəsində açıqlamalar etmişdi. Belə ki, bu layihəyə görə bu ilin ikici yarısında Snapdragon 8 Gen 2 ilə təchiz edilmiş cihazlar birbaşa peyk bağlantısına sahib olacaqdı. Artıq il bitmək üzrədir, hətta artıq Snapdragon 8 gen 3 əsaslı cihazlar da bazara çıxıb. Lakin qualcomm şirkətinin yeni texnologiyasından xəbər yoxdur. İndi isə bu durğunluğun səbəbləri məlum olub.
Qualcomm şirkəti yeni peyk bağlantısı layihəsi ilə bağlı açıqlamalar edərkən, Snapdragon Satellite xidmətinin işə salınması üzrə tərəfdaşın peyk operatoru Iridium olacağını bildirmişdi. Qeyd edək ki, bu peyk mobil operatoru yerin hər iki qütbü də daxil olmaqla 100% dünyanı əhatə edirdi. Bununla belə, CNBC mənbəsi ortaya çıxarıb ki, Qualcomm və Iridium arasındakı tərəfdaşlıq bitib. Daha əvvəl yayımlanan bəyanatda Iridium şirkətlərin Snapdragon çiplərinə əsaslanan smartfonlarda peyk mesajlaşma və təcili yardım xidmətini uğurla inkişaf etdirib sınaqdan keçirdiklərini bildirmişdi. Lakin texniki uğura baxmayaraq, smartfon istehsalçıları öz cihazlarında bu texnologiyanı dəstəkləməyiblər.
Yekunda isə smartfon istehsalçıları ilə razılıq əldə edə bilməyən Qualcomm və Iridium müqaviləni ləğv etmək qərarına gəlib. Qeyd edək ki, əvvəlcə Əvvəlcə texnologiyanın 2023-cü ildə Honor, Motorola, Nothing, OPPO, Vivo və Xiaomi cihazlarında işləyəcəyi bildirilirdi. Ümumiyyətlə bu layihənin əsas üstünlüyü, sadəcə fövqəladə mesajlar göndərmək deyil, həm də mobil rabitə olmadıqda adi mesaj mübadiləsi imkanı olması idi. Bununla belə, Qualcomm bildirib ki, smartfon istehsalçıları artıq mövcud olan standart peyk rabitəsi həllərinə üstünlük verirlər.
