Gələn il Qualcomm şirkətinin mobil prosessorları üçün həqiqətən də vacib bir il olacaq. Yeni məlumatlara görə şirkət nəinki prosessorlarında özünün təkmilləşdirdiyi və hazırladığı nüvələrdən istifadə edəcək, həm də Snapdragon 8 Gen 4 konfiqurasiyasını yenidən nəzərdən keçirəcək. O cümlədən Qualcomm yeni çipsetində MediaTek kimi enerjiyə qənaət edən nüvələrdən imtina etmək niyyətindədir.
Çinin Digital Chat Station mənbəsinə görə qarşıdan gələn Snapdragon 8 Gen 4 çipseti TSMC-nin yalnız Apple A17 Pro istehsal etmək üçün istifadə edilən 3nm isthsal prosesi ilə hazırlanacaq. Habelə qeyd etdiyimiz kimi, şirkət yeni strategiyaya keçid edərək enerjiyə qənaət edən nüvələrdən imtina edir. Yeni flaqman çipsetin 2 yüksək performanslı, 6 orta performanslı nüvəyə sahib olacağı bildirilir. Bununla belə, Qualcomm əvvəllər noutbuklar üçün Snapdragon X Elite-də debüt edən yeni Orion nüvələrinə keçmək niyyətini təsdiqləmişdi.
Hələlik enerjiyə qənaət edən nüvələrdən imtina etmək qərarının smartfonların performansına necə təsir edəcəyini proqnozlaşdırmaq çətindir. Sınaqlara əsasən Snapdragon 8 Gen 3 Snapdragon 8 Gen 2-dən daha çox enerji istehlak edir və enerjiyə qənaət edən nüvəsi olmayan MediaTek Dimensity 9300 bu çipsetlərdən 40% daha səmərəlidir. Ümid edək ki, Qualcomm yeni addımı ilə bütün yarana biləcək problemləri düşünüb və onlara qarşı tədbir görüb.
