Dünyanın ən nəhəng çip istehsalçısı Qualcomm mindən çox işçisini ilə yolları ayırır. Belə ki, Qualcomm şirkəti satışların azalması və gəlirlərin aşağı düşməsi səbəbi ilə 1258 işçisini qovur. Şirkət kaliforniyadakı iki ofisində ümumilikdə 1258 işçisi ilə yolları ayıraraq maliyyə problemlərini aradan qaldırmağı hədəfləyir. Qeyd edək ki, şirkətin San Diego şəhərindəki 1064 işçisi və Santa Clara ofisindəki 194 işçisi artıq ixtisar edilib. Maraqlısı budur ki, bu rəqəm 51 min işçisi olan şirkətin işçi qüvvəsinin 2,5%-nə uyğun gəlir.
Şirkətin bu ilin üçüncü rübündə çip bazarındakı durğunluqdan sonra gəlirlərinin azalması səbəbindən belə bir qərar verdiyi bildirilir. Qualcomm-un müraciətinə əsasən, işçilərin ixtisarı dekabrın 13-dək aparılacaq və restrukturizasiya aparılacaq. Gəlin görək Qualcomm niyə görə 1258 işçisini bir anda qovur? Əslində səbəb çox aşkardır. Belə ki, bu addımın əsas səbəbi Huawei çipsetləridir. Əslində ABŞ ilə Huawei arasındakı mübarizə də məhz bundan qaynaqlanır. Huawei şirkətinin ucuz məhsulları hazırda bazarda digər texnologiya nəhəngləri üçün problem yaradır. Qualcomm “makroiqtisadi və tələb mühitində davam edən qeyri-müəyyənlik” səbəbindən gəlirlərin azalması riski ilə üzləşir.
Əslində ötən ay məşhur analitik Ming-Chi Kuo bildirmişdi ki, Huawei şirkətinin öz çiplərini bazara çıxarması Qualcomm və digərləri üçün çətinliklər meydana gətirəcək. Maraqlısı budur ki, Çin istehsalçısı 2023-cü ilə qədər Qualcomm-dan 40 milyondan çox çipset alıb. Lakin gələn il bu rəqəmin ən minimal həddə enəcəyi də məlumdur. Artıq Qualcomm şirkəti Huawei kimi nəhəng müştərisini itirmək təhlükəsi ilə üz-üzədir.
