IDC-nin qlobal smartfon bazarı üzrə hesabatına əsasən, 2024-cü ilin ikinci rübündə smartfon tədarükü 6,5% artaraq 285,4 milyon ədədə çatıb. Qeyd edək ki, son dövrlərdə smartfon satışlarındakı azalma olduqca əhəmiyyətli səviyyəyə çatmışdı. İndi isə daha çox Çinli brendlər sayəsində smartfon satışlarında qeydə alınan bu azalma dövrü yerini canlanma dövrünə ötürüb.
Bazar araşdırması şirkəti IDC-nin qlobal smartfon bazarı ilə bağlı hesabatına əsasən, 2024-cü ilin ikinci rübündə smartfon tədarükü illik əsasda 6,5% artaraq 285,4 milyon ədədə çatıb. Beləliklə, smartfon satışları ardıcıl dörd rüb artım əldə edərək bərpa olunmağa başlayıb. “Samsung” və “Apple” ilk iki yerdəki mövqelərini qoruyub saxlasalar da, reytinqdə ilk 5-likdə yer alan şirkətlərin hamısı tədarüklərini artırmağı bacarıb. Ancaq görünən odur ki, hər iki şirkətin bazar payı bir qədər azalıb. Ötən ilin eyni dövründə Samsung 20% paya sahib olduğu halda, bu il payı 18,9%-ə qədər azalıb. Apple-ın payının 16,6%-dən 15,8%-ə düşdüyü görünür.
Maraqlısı budur ki, smartfon satışlarında baş verən bu canlanma dövründə satışlarını ən çox artıran brend Çin mərkəzli Xiaomi brendidir. Ötən illə müqayisədə satışlarını 27,4% artıran Xiaomi bazar payını 12,4%-dən 14,8%-ə yüksəldə bilib. DC bildirir ki, Xiaomi və Vivo xüsusilə Çində və inkişaf edən bazarlarda satışlarını əhəmiyyətli dərəcədə artırıb. Habelə, mənbənin verdiyi məlumata görə, premium smartfon satışları da artmaqdadır. Samsung və Apple isə bu tendensiyadan ən çox faydalanan istehsalçılardır. Çin mərkəzli istehsalçılar münasib qiymətə smartfon satışında fərqlənsə də, orta səviyyəli cihazların satışında çətinlik çəkirlər.
