Hər ötən gün smartfon istehsalçıları yeni smartfon modellərini təkmilləşdirməklə bazara çıxarır. Belə ki, smartfon istehsalçılarının aqressiv biznes strategiyaları səbəbindən bazar həddindən artıq istehsalla üzləşir. Bu ilin birinci rübündə smartfon tədarükü artsa da, analitiklər ikinci rübdə 5-10% azalma proqnozlaşdırırlar. Bir sözlə deyə bilərik ki, qlobal smartfon bazarı hazırda həddindən artıq təklifə sahibdir və təkliflərin sayı tələbi ötür deyə bolluqla üz-üzədir.
Birinci rübdə qlobal smartfon istehsalı illik müqayisədə 18,7% artaraq 296 milyon ədədə çatıb. “TrendForce” adlı mənbənin məlumatına görə, həddindən artıq ehtiyat toplanması və aşağı istehlak tələbi səbəbindən ikinci rübdə smartfon bazarında azalma gözlənilir. Analitiklər yüksək inflyasiya və geosiyasi gərginlik, eləcə də istehlakçı tələbinin təzyiq altında qalması səbəbindən ikinci rübdə istehsalın 5-10% azalacağını proqnozlaşdırırlar. Birinci rübdə smartfon bazarında Samsung 20,1%, Apple 16.2%, Xiaomi 13.9%, Oppo 11.4% bazar payı ilə liderlik edib.
Qeyd edək ki, ilin birinci rübündə Samsung 59,5 milyon smartfon istehsal edib. Bunların 22,5%-i flaqman Galaxy S24 seriyasından olub. Ümumiyyətlə, analitiklər AI yeniliklərinin bu smartfon seriyasına olan tələbatı artırdığını bildiriblər. Bununla belə, Galaxy A seriyalı smartfonların zəif satışları səbəbindən istehsalın ikinci rübdə 10%-dən çox azalacağı gözlənilir. Apple, Çində satışların azalması səbəbindən istehsalı 47,9 milyon ədədə qədər azaldıb ki, bu da rüb ərzində 39% azalma deməkdir. İkinci rübdə isə məhsul xətləri yeniləndikdə yəni yeni seriyasını təqdim etdikdə təxminən 10% əlavə azalma gözlənilir. Ümumilikdə, TrendForce analitikləri iqtisadi qeyri-müəyyənliklər və bazarın doyması fonunda yaxın gələcəkdə smartfon istehsalında artımın yavaşlayacağını proqnozlaşdırırlar.
