Volvo brendinin törəmə şirkətlərindən olub, elektromobillər üzrə ixtisaslaşan Polestar şirkəti ilk smartfon modelini təqdim etməyə hazırlaşır. Belə ki, şirkətin ilk smartfonu ilə bağlı yeni məlumatlar ortaya çıxıb. Maraqlısı budur ki, ortaya çıxan qısa tanıtım videosunda cihaz Meizu brendinin smartfonlarına çox bənzədilib. Xüsusilə Meizu 20 ilə olan oxşarlığı texnologiya həvəskarlarının diqqətindən yayınmayıb. Ümumiyyətlə Polestar brendi Geely Holding Group-a aiddir. Məhz bu brendin elektromobilləri də uyğun olaraq çindəki fabriklərdə istehsal edilir. Şirkət özü 1996-ci ildə yaransa da, 2015-ci ildə Volvo Cars tərəfindən alınmışdı.
Hazırda bir çox Polestar konsept karı mövcud olsa da, şirkətin özünəməxsus elektromobilləri mövcud deyil. Buna baxmayaraq Polestar imzalı bir çox Volvo modeli indiyə qədər təqdim edilmişdir. Maraqlısı budur ki, elektrikli və hibrid avtomobillər üzrə ixtisaslaşan Polestar bu dəfə tamamilə təcrübəsiz olduğu sahəyə daxil olur və smartfon təqdim etməyə hazırlaşır. Hətta bu smartfon çinin məşhur Meizu brendinə məxsus Meizu 20 modelinə bənzərliyi ilə diqqət çəkir.
Qeyd edək ki, Polestar imzalı ilk smartfonda üçlü kamera dizaynından istifadə olunacaq. O cümlədən smartfonun Polestar elektromobilləri ilə mükəmməl səviyyədə inteqrasiya ediləcəyi gözlənilir. Hətta bu smartfonun Meizu ilə əməkdaşlıq çərçivəsində hazırlanmış Polestar OS interfeysindən istifadə edəcəyi də gözlənilir. Yeni smartfonun Snapdragon 8 Gen 3 və ya MediaTek imzalı flaqman çipset ilə bazara çıxacağı gözlənilir. Hələlik cihazın nə vaxt təqdim ediləcəyi və hansı qiymətə sahib olacağı məlum deyil.
