Ötən aylarda yeni flaqman iPhone 15 seriyasını təqdim edən Apple iPhone 16 üçün artıq işə qoyulub. Belə ki, analitiklərə görə Apple şirkəti iPhone 16 Pro modelində yeni dəlikli ekran dizaynını sınaqdan keçirir. Ümumiyyətlə Apple iPhone X seriyasında daha fərqli ekran dizaynına keçid etdikdən 4 il sonra iPhone 14 seriyasındakı dinamik ada ilə gündəmə gəlmişdi. Hətta bir çox analitik dinamik adanın yeni seriyada ləğv ediləcəyini və ya daha da kiçildiləcəyini iddia etmişdi. Apple bu yeniliyi iPhone 15 seriyası ilə bizlərə təqdim etməsə də, gələn il daha fərqli yeniliklər etməyə hazırlaşır.
Şayiələrə görə, Apple iPhone 16 Pro prototipində Android smartfonlarda gördüyümüz dəlikli ekran dizaynını sınaqdan keçirir. Apple bu dəfə Samsung smartfonlarındakı dizaynda istifadə etməyi düşünür. Daha əvvəl yeni seriyada ekranaltı kamera dizaynından istifadə ediləcəyi iddia edilsə də, yeni məlumatlar bunu təkzib edir. Maraqlısı budur ki, dəlikli ekran Android smartfonlarında ənənəyə çevrilsə də, onların heçbirində Face ID sensoru yoxdur. Məhz bu problemi aradan qaldıra bilmək üçün Apple ekranın altına müxtəlif sensorlar yerləşdirə bilər.
Lakin bu sensorları ekranın altına quraşdırmaq elə də asan deyil. Çünki, ekranın altına quraşdırılmış kameraların görüntü keyfiyyəti pisləşdiyindən, Face ID-nin etibarlılığı da şübhə altında qalır. Bəzi analitiklərə görə Apple hələ dəlikli ekrana keçə bilmək üçün bir çox problemi aradan qaldırmalıdır. Məhz bu səbəbdən biz yeni ekran dizaynının məhz 2025-ci ildə iPhone 17 seriyası ilə görə bilərik. Display Supply Chain Consultants-ın təsisçisi və baş direktoru Ross Young da əvvəllər dəlikli ekran dizaynının iPhone 16 ilə deyil, gələcək seriyalar ilə birlikdə təqdim ediləcəyini bildirmişdi.
