Ədliyyə Departamentinin (DOJ) texnoloji nəhəngin biznes strukturunu yenidən formalaşdırmaq məqsədi ilə geniş sanksiyalar tələb etməsi ilə Google-un onlayn axtarışda inhisarına malik olduğuna dair iddianın “həll” mərhələsi başlayıb. Belə ki, bu sanksiyalardan ən diqqət çəkəni Google-un milyardlarla istifadəçi kütləsinə sahib Chrome brauzerini satmağa məcbur olması ola bilər. Maraqlısı budur ki, Sam Altman-ın rəhbərlik etdiyi OpenAI, Google Chrome brauzerini almaq istəyir.
Bloomberg-in məlumatına görə, məhkəmənin ikinci günündə şahid qismində ifadə verən ChatGPT məhsul meneceri Nik Turlidən OpenAI-nin satışa çıxacağı təqdirdə Chrome-u almaqda maraqlı olub-olmayacağı soruşulub. Cavab aydın olub: “Bəli, Turley-in fikrincə, Chrome OpenAI-nin çətiri altına daxil olmaqla, daha dərin inteqrasiyalar mümkün ola bilər. Turley-in vizyonu daha çox süni intellekt əsaslı təcrübəyə işarə edir. Əgər OpenAI Google Chrome brauzerini alarsa brauzer vasitəsilə əldə edilən hər bir məzmun süni intellekt dəstəyi ilə zənginləşdirilə bilər. Bu, istifadəçilərin internetdən istifadə tərzində köklü dəyişikliklərə səbəb ola bilər. Məsələn, veb-sayt məzmununu real vaxtda ümumiləşdirən, istifadəçi niyyətini anlayan və tövsiyələr verən və ya faktları yoxlayan brauzer təcrübəsi artıq sadəcə bir imkan olmaya bilər.
Qeyd edək ki, Chrome Google-un nəzarətini itirə biləcəyi yeganə əmlak deyil. Ayrı bir vəziyyətdə, Google-un bu ayın əvvəlində onlayn reklam texnologiyası ilə rəqabətə zidd davranışlar göstərdiyi aşkar edilib. Bundan əlavə, Google-u parçalamaq və bu parçaları başqalarına satmaq risksiz deyil. Məsələn, Chrome-a nəzarət başqa bir böyük texnoloji şirkətə – süni intellektdə qlobal lider olan OpenAI-ə keçərsə, bu, başqa növ monopoliya mübahisəsini alovlandıra bilər.
