OpenAI, məşhur ChatGPT xidmətinin Çində istifadəsini qadağan etməyi planlaşdırır. Bununla yanaşı, istifadəçilər və tərtibatçılar şirkətin APl vasitəsilə giriş əldə etmək yollarını tapmağa davam edirlər. Çinin dövlət media orqanı SeriTimes, OpenAI-nin Çindəki istifadəçilərə iyulun 9-dan etibarən girişi bloklamaq planları barədə məlumat verən məktublar göndərməyə başladığını bildirib.
Belə ki, OpenAI şirkətindən Çinli istifadəçilərə göndərilən məktubda “Biz OpenAI xidmətlərinə çıxışı dəstəkləmədiyimiz bölgələrdən APl trafikinin qarşısını almaq üçün əlavə tədbirlər həyata keçiririk” deyə bildirilib. Bu addım isə, tətbiqlərində OpenAl şirkətiningeniş dil modellərindən istifadə edən çoxlu sayda Çinli startaplara təsir göstərə bilər. Qeyd edək ki, OpenAI şirkətinin ChatGPT xidməti 160-dan çox ölkədə mövcud olsa da, Çinin bu xidmətə çıxışı artıq bloklanır. Şirkətin yeni siyasətinə görə, xidmət dəstəklənməyən ölkələrdə istifadəçilər şirkətin tətbiqlərinə girişin bloklanması və ya dayandırılması ilə üzləşə bilər.
Xidmətlərin əlçatan olmayan ölkələrdə bloklanması ilə bağlı qərarın hansı səbəbdən alındığı hələlik bəlli deyil. Ötən ay OpenAI şirkəti Çin mənbələri başda olmaqla onlayn dezinformasiyaların yayılması üçün süni intellekt modellərindən istifadə edildiyini bildirmişdi. Bloomberg qeyd edib ki, OpenAI-nin qərarı Vaşinqtonun ABŞ texnologiya şirkətlərinə Çinin ABŞ-da hazırlanmış qabaqcıl texnologiyalara çıxışını məhdudlaşdırmaq üçün təzyiqi ilə bağlı ola bilər. Bu addım innovativ texnologiyalara çıxış üzərində rəqabət və münaqişənin əsas olduğu texnologiya sahəsində ABŞ və Çin arasında gərgin münasibətləri bir daha vurğulayır.
