“Bakı Kristal Zal”da baş tutan builki “Baku ID” tədbirində 200-dən artıq yerli və xarici investor, 100-dən artıq xarici və yerli startap, 5000 iştirakçı və 50-dən artıq tərəfdaş yer alıb. Tədbir çərçivəsində Süni İntellekt üzrə panel sessiyası təşkil olunacaq. Bundan başqa, qurumun icraçı direktoru Fariz Cəfərov “Emissiyanın sıfıra enməsində startapların artan rolu” panelində spiker qismində çıxış edəcək.
Festival çərçivəsində 4SİM stendində mərkəzin fəaliyyəti ilə tanış olmaq, həmçinin “4Sİ Akademiyası” çərçivəsində Coursera platformasında təklif olunan kurslardan ödənişsiz yararlanmaq üçün kuponlar qazanmaq mümkün olacaq. “Baku ID” çərçivəsində SABAH Hub və 4SİM arasında ölkədə rəqəmsal iqtisadiyyatın inkişafı çərçivəsində yerli startap ekosisteminin inkişafına dəstək göstərilməsi və bu sahədə əməkdaşlıqla bağlı ikitərəfli Anlaşma Memorandumunun imzalanması nəzərdə tutulub.
Festivalın startap müsabiqəsində iştirak edən startaplar 1 milyon ABŞ dolları dəyəri olan investisiya fondundan yararlana bilərlər.
İştirakçıları həmçinin qlobal texnologiya şirkətlərindən olan spikerlərin çıxışları, müxtəlif panel sessiyaları, region strataplarının təqdimat çıxışları, netvorkinq və digər maraqlı fəaliyyətlər gözləyir.
SABAH.HUB-ın Baş icraçı direktoru Rəhim Bayramlı builki “Baku ID” tədbirində 200-dən artıq yerli və xarici investorun, 100-dən çox xarici və yerli startapın, 5000 iştirakçı və 50-dən artıq tərəfdaşın yer alacağını bildirib.
Eyni zamanda “AZƏRTAC” informasiya agentliyi tərəfindən istinad edilən məlumata görə, Rəhim Bayramlı diqqətə çatdırıb ki, bu il SABAH.HUB, həmçinin vençur fondunu yaradır. “SABAH.HUB-dan olan startapların son iki il ərzində yerli və regional investorlardan 4 milyon dollardan çox vəsait topladığını elan etməkdən çox məmnunam. Yaxın iki gündə, artıq elan olunduğu kimi, bu məbləğ ən azı daha 2 milyon dollar artacaq. Bu, yaxşı başlanğıcdır, lakin səyahətimizin yalnız əvvəlidir. Mən 25 milyon dollar dəyərində öz vençur kapital fondumuzun yaradılmasını elan etməkdən qürur duyuram. SABAH.fund Cənubi Qafqaz və Mərkəzi Asiya, böyük qlobal ambisiyaları olan regionlardakı şirkətlərə sərmayə qoyaraq, startap maliyyələşdirməsini növbəti səviyyəyə qaldıracaq. Bu hadisə üçün ilk çekimizi yaxın 48 saat ərzində verməyi planlaşdırırıq”, – deyə o bildirib.
Qeyd edək ki, “Baku ID”nin baş sponsorları Elm və Təhsil Nazirliyi, SOCAR, PAŞA Holding, ABB və Mappable, tərəfdaşlar isə 4SİM və IDDA-dır.
