Süni intellekt sahəsində aparıcı şirkətlərdən biri olan OpenAI böyük əməliyyat xərcləri səbəbindən 12 ay ərzində iflas ərəfəsində ola bilər. Belə ki, süni intellekt nəhəngi OpenAI bu il ərzində 5 milyard dollar zərər ilə iflas vəziyyətini elan edə bilər.
Ümumiyyətlə, süni intellektə axın edən və bu sahədə ilkə imza atan şirkətlər son illərdə inanılmaz yüksək qazanc əldə etdilər. Hətta, son bir neçə ayda Microsot, Apple və Nvidia şirkətlərinin dünyanın ən dəyərli şirkəti adını qazanmaq üçün mübarizə apardığının şahidi olduq. Bazar analitikləri bu şirkətlərin gəlirlərinin və mənfəətlərinin artımını onların məhsul və xidmətlərində texnologiyaya erkən sərmayə qoymaları ilə əlaqələndirirlər. Onların sərmayə qoyduqları texnologiya isə süni intellektdir. Qeyd edək ki, süni intellekt sıçrayışı ilk dəfə 2022-ci ilin sonunda OpenAI brendinin ChatGPT süni intellekt çatbotunu təqdim etməsi ilə başlamışdı.
Süni intellektin bu qədər geniş yayılmasına səbəb olan OpenAI bu il ərzində 5 milyard dollar zərər edərək iflas edə bilər. Bildiyimiz kimi, OpenAI şirkəti əsasən Microsoft tərəfindən dəstəklənir. İndiyə qədər Microsoft-un OpenAI şirkətinə 13 milyard dollar sərmayə qoyması aysberqin yalnız görünən hissəsidir. Şirkətin süni intellekt modelləri Microsoft-un serverlərində də işləyir. Əvvəlki açıqlamalara görə, sadəcə ChatGPT-nin işləməsini təmin etmək şirkət üçün 700 min dollara başa gəlir və bu məbləğ çatbot təkmilləşdikcə artır. Əvvəllər açıqlanmayan maliyyə məlumatlarına əsaslanan hesabata görə, OpenAI 2024-cü ildə 5 milyard dollar itirəcək.
Belə ki, şirkət daha çox kapital toplamasa, 12 ay ərzində likvidini istehlak edəcək və iflasla üzləşəcək. Hesabatda qeyd edilir ki, şirkət süni intellekt modellərinin hazırlanmasına 7 milyard dollar və işçi heyətinə 1,5 milyard dollar xərcləmək niyyətindədir. Təkcə bu xərclər rəqiblərinin 2024-cü il üçün xərc təxminlərini bir neçə dəfə qabaqlayır. Gəlir tərəfində, OpenAI-nin ChatGPT-dən hər il 2 milyard dollar və dil modellərindən (LLM) əldə edilən giriş haqlarından əlavə 1 milyard dollar qazandığı bildirilir.
