Nvidia şirkətinin uzun müddətdir ki, bir çox süni intellekt nəhəngi ilə əməkdaşlıq etdiyi məlumdur. İndi isə ortaya çıxıb ki, Nvidia süni intellekt çip bazarında 90% paya malikdir və rəqiblərinin onunla mübarizə aparması imkansızdır. Bir sözlə deyə bilərik ki, Nvidia şirkəti süni intellekt sənayesini darmadağın edib. Ümumiyyətlə Nvidia şirkəti təqdim etdiyi qrafik kartlar üçün hər dəfə yeni süni intellekt texnologiyası təklif edir. Məhz bu texnologiyalardan ən məşhuları DLSS və RTX funksiyalarıdır.
Bundan əlavə Nvidia şirkətinin bir çox süni intellekt əsaslı proqramları da mövcuddur ki, bu da şirkətin süni intellekt çip bazarında 90% paya malik olmasını heç də təəccüblü etmir. Nvidia-nın uğuru bəziləri üçün şans məsələsi olsa da, şirkət əslində doğru zamanda doğru məhsula sahib olmaqla ən çətin tapşırığın öhdəsindən gəlməyi bacarıb. Hətta bu uğur şirkətin trilyon dollarlıq şirkətlər qrupuna daxil olmasına belə imkan verib. Gartner və Moor Insights & Strategy firmalarının tanınmış analitikləri şirkətin 2024-cü il ərzində də güclü bazar payına sahib olacağını proqnozlaşdırıblar.
Nvidia şirkətinin bazar payının əksər hissəsini ələ keçirməsinə şirkətin H100 AI GPU-ları imkan verib. Hazırda bir çox süni intellekt nəhəngi məhz adı çəkilən GPU-lardan istifadə edir. Bununla belə Nvidia şirkətinin ən böyük müştərilərindən biri olan OpenAI artıq süni intellekt çipi tərəfində Nvidia şirkətindən asılılığını dayandırmaq və ya azaltmaq niyyətindədir. Hətta şirkət artıq TSMC kimi nəhənglər ilə danışıqlara başlamışdı. Yəni, yaxın illərdə Nvidia şirkətinin bazar payı azala bilər.
