Süni intellekt şirkətlərinin təlim məlumatları kimi istifadə etdiyi məzmun və platformalar mübahisələrə səbəb olur. Belə ki, bu dəfə Nvidia şirkətinin süni intellekt üçün Netflix və YouTube videolarından icazəsiz istifadə etdiyi bildirilir.
Ümumiyyətlə, son dövrlərdə süni intellekt sahəsində çalışan əksər süni intellekt şirkətləri və ya texnologiya şirkətləri təlim məlumatları üçün icazə olmadan platformalardakı məzmundan istifadə edirlər. Bunun ən son nümunəsi kimi Nvidia-nı misal göstərə bilərik. Belə ki, texnologiya nəhənginin süni intellekt komandasının icazəsiz Netflix və YouTube videolarından istifadə etdiyi ortaya çıxıb. Məlumatlara görə, Nvidia kommersiya xarakterli süni intellekt layihələri hazırlamaq üçün işçilərindən YouTube, Netflix və digər platformalardan video yükləmələrini istəyir.
Bildirilir ki, şirkət Omniverse 3D kimi xidmətlərini inkişaf etdirmək üçün məşhur platformalardan çıxarılan videolardan istifadə edir. Digər tərəfdən Nvidia, etdiklərinin müəllif hüquqları qanununun hərfinə və ruhuna tam uyğun olduğunu vurğulayır. YouTube isə şirkətlərin bu münasibətindən məmnun deyil. Şirkətin baş direktoru Neal Mohan şirkətlərin süni intellekt modellərini öyrətmək üçün YouTube-dan istifadəsinin platformanın qaydalarının açıq şəkildə pozulması olduğunu bildirib. Maraqlısı budur ki, Nvidia-nın təkcə YouTube və Netflix videolarından deyil, həmçinin MovieNet film treyler bazasından, video oyun görüntülərinin daxili kitabxanalarından və Github video verilənlər bazalarından WebVid və InternVid-10M-dən icazəsiz istifadə etdiyi bildirilir. Bütün bu verilənlər bazasında isə on milyonlarla məzmun mövcuddur.
