Son illərdə kosmosla bağlı böyük işlər görən Çin bu gün kosmosdan internet yarışına rəsmi olaraq daxil olub. Çin bu yaxınlarda Long March-5 Y8 raketindən istifadə etməklə kosmosdan aşağı yer orbitinə internet təmin edəcək ilk peyklərini buraxıb. “Thousand Sails” adlı şəbəkə üçün 15 mindən çox peyki orbitə çıxarmaq və təkcə ölkə daxilində deyil, qlobal olaraq kosmosdan internet təmin etmək istəyən Çin, 2025-ci ilə qədər 640-dan çox peyki kosmosa buraxmağı hədəfləyir.
Qeyd edək ki, Çin bundan əvvəl, kosmosdan internet təklif edən ən böyük ad olan SpaceX Starlink ilə bağlı açıqlama vermişdi. Bildiyiniz kimi, SpaceX-in Starlink xidməti durmadan inkişaf edir və yeni müştərilər əldə edir. Bu vəziyyət isə bəzi ölkələri narahat edir. Rusiya və Ukrayna münaqişəsi zamanı Ukraynaya kömək etmək üçün də fəal şəkildə istifadə edilən Starlink, xüsusilə Çində narahatlıq yaradıb. Çin bir bəyanat verərək Starlink sisteminin milli təhlükəsizliyini təhdid edəcəyi təqdirdə bəzi müdafiə mexanizmlərini inkişaf etdirmək istədiyini bildirmişdi. Burada ilk məqsəd Starlink şəbəkəsini bağlamaq və ya Çin daxilində istifadəyə yararsız hala gətirmək idi.
Starlink peyklərini bağlamaq üçün partlamağı belə düşünən Çinin, bunu etmək üçün kosmik gücü var. Bundan əlavə, Çin bütün Starlink peyklərini izləmək üçün xüsusi sistemlər hazırlamağı hədəfləyir və Starlink-in hərbi məqsədlər üçün istifadə oluna biləcəyini bildirir. SpaceX Starlink daha çox mülki sistem kimi görünür, lakin ABŞ ordusundan investisiya alır. Çin alimləri xəbərdarlıq edir ki, Starlink döyüş təyyarələri və pilotsuz uçuş aparatlarının əlaqə sürətini 100 dəfədən çox artıra bilər. Çin həmçinin iddia edir ki, Starlink peykləri gələcəkdə müxtəlif avadanlıqlarla təchiz olunaraq ABŞ-ın kosmosdan casusluq fəaliyyətlərinə kömək edə bilər.
