Microsoft yeni və mükafatlarla dolu proqrama start verib. Belə ki, Microsoft şirkəti Bing sistemindəki süni intellekt texnologiyalarında zəiflik aşkar edənlərə 15 min dollar dəyərində mükafat verəcəyini elan edib. Qeyd edək ki, bu təşəbbüsün əsas məqsədi Bing-in süni intellektlə idarə olunan xidmətindən istifadə edərkən istifadəçi təcrübəsinin təhlükəsizliyinə əhəmiyyətli dərəcədə təsir göstərə biləcək zəiflikləri müəyyən etməkdir. Proqram dünyanın hər yerindən olan tədqiqatçılara aşkar edilmiş zəifliklərlə bağlı ixtisaslı hesabatlara görə 2000-15000 ABŞ dolları arasında dəyişən mükafatlar qazanmaq imkanı təklif edir.
Microsoft şirkətinin süni intellekt texnologiyalarında zəiflik aşkar edənlərə mükafat təklif etməsində başqa maraqları da var. Belə ki, Microsoft-un məqsədi təhlükəsizlik mütəxəssislərinin diqqətini Bing-in məhsuldar çatbotunun işini və şirkətin digər məhsullarına inteqrasiyasını təhlil etmək üçün cəlb etməkdir. Qeyd edək ki, Proqram ən azı 14 yaşı olan tədqiqatçılar üçün açıqdır və yetkinlik yaşına çatmayan iştirakçılar üçün xüsusi qanuni nümayəndələrin icazəsi tələb olunur.
Zəifliyin aşkarlanması proqramı Bing.com saytındakı bing süni intellektinin işini, habelə onun Microsoft Edge brauzerinə, Microsoft Start proqramına və Skype mobil tətbiqinə inteqrasiyasını əhatə edir. Bundan əlavə tədqiqatçılar əmin olmalıdır ki, aşkar etdikləri zəiflik daha əvvəl şirkətə bildirilməyib. Digər məqamlarda isə aşkar edilən zəifliklər vacibliyinə görə təsnif ediləcək və tədqiqatçıya 15 min dollara qədər mükafat təklif olunacaq.
