Microsoft və OpenAI arasındakı əməkdaşlıq ABŞ-da yerləşən FTC və Böyük Britaniyada yerləşən CMA tərəfindən araşdırılır. Ümumiyyətlə FTC yəni ABŞ Federal Ticarət Komissiyası və CMA, Böyük Britaniya Rəqabət və Bazarlar İdarəsi daim texnologiya nəhənglərinin əməkdaşlıqlarını nəzərdən keçirir. Burada əsas məqsəd bu əməkdaşlıqların antiinhisar qanunlarının pozub-pozmadığını aydınlaşdırmaq və bazardakı rəqabəti sıfıra endirib-endirmədiyini müəyyənləşdirməkdir.
Bildiyimiz kimi Microsoft süni intellekt nəhəngi OpenAI-nin ən böyük maliyyə dəstəkçisidir. Habelə Microsoft şirkəti OpenAI-nin idarə heyətində də iştirak edir. Microsoft və OpenAI arasındakı milyardlarla dollarlıq əməkdaşlıq hələlik rəsmi olaraq araşdırılmır. Həm FTC, həm də CMA bu əməkdaşlıq barədə hələlik zəruri məlumatları toplamaqla məşğuldur. Lakin bu toplanan məlumatlar araasında antiinhisar qanunlarını pozan və ya rəqabəti təhdid edən birşey aşkarlanarsa proses rəsmiləşə bilər.
Ümumiyyətlə Microsoft şirkəti ötən aylarda CMA ilə uzun danışıqlar aparmışdı. Bunun əsas səbəbi də şirkətin Activison Blizzardı almaq istəyi idi. Uzun danışıqlardan sonra isə Microsoft nəhayət istədiyini müəyyən şərtlər qarşılığında əldə etmişdi. İndi Microsoft yenidən CMA radarındadır. Microsoft-un OpenAI üzərindəki üstünlüyünün nə qədər böyük olduğu rəsmən məlum deyil, lakin mənbələr şirkətin 49 faizinə sahib olduğunu bildirir. Habelə OpenAI-nin ChatGPT daxil olmaqla bütün süni intellekt modelləri Microsoft-un Azure xidmətində işləyir.
