Nəhayət Apple şirkətindən sonra Microsoft şirkətinin də bazar dəyəri 3 trilyon dollara çatıb. Beləliklə, amerikalı texnologiya nəhəngi bazar dəyəri 3 trilyon dollara çatan ikinci şirkət olaraq tarixə keçib. Qeyd edək ki, bu uğur Microsoft-un səhmlərinin çərşənbə günü NASDAQ birjasında 1.5 faiz bahalaşmasından sonra baş verib. Beləliklə Windows əməliyyat sistemlərinin qurucusu 48 illik tarixində ilk dəfə olaraq bazar dəyərini 3 trilyon dollar həddinə çatdırmağı bacarıb.
Ümumiyyətlə Microsoft şirkətinin səhmləri son aylarda aktiv şəkildə dəyər qazanır. Belə ki, bu inkişafın və ya dəyər artımının əsas səbəbi kimi süni intellektlə bağlı investorların həyəcanı göstərilir. Bildiyimiz kimi, Microsoft şirkəti OpenAI süni intellekt nəhənginin əsas maliyyə dəstəkçisidir. Eləcə də, şirkət süni intellektlə bağlı müxtəlif layihələrdə aktiv şəkildə iştirak edir. Habelə, ötən il Microsoft şirkəti Microsoft 365 və Copilot xidmətlərinin qiymətlərini elan etdikdən sonra da, investorlar səhm qiymətlərində əhəmiyyətli artımla reaksiya vermişdilər.
Microsoft şirkətinin bazar dəyəri 3 trilyon dollara çatıb, həmçinin son 5 ildə şirkətin səhm qiymətləri 107 dollardan 404 dollara qədər yüksəlib. Satya Nadella-nın rəhbərlik etdiyi illərdə Microsoft şirkəti bir çox süni intellekt şirkəti satın almışdı və ChatGPT-nin qurucusu OpenAI şirkətinə 10 milyard dollardan çox sərmayə qoymuşdu. Təbii ki, bu qədər satın alımların və sərmayələrin də nəticəsi olaraq şirkət indi öz bazar dəyərini rekord həddə çatdırıb.
