Bildiyimiz kimi, Elon Musk bir neçə il əvvəl kompakt və daha ucuz elektromobil barədə elektromobil həvəskarlarına söz vermişdi. Daha əvvəl Elon bu elektromobil üçün 2020-ci ili işarə etsə də, sonradan bu tarix təxirə salınmalı olmuşdu. İndi isə 2025-ci ildə satışa çıxarılması gözlənilən Tesla Model 2 Redwood barədə bir neçə maraqlı detal ortaya çıxıb.
İlk öncə onu qeyd edək ki, Tesla Model 2 Redwood Honda Civic-dən ilhamlanan NV9X platformasında kompakt krossover kimi bizi qarşılayacaq. Habelə ötən ilin 4-cü rübündə Tesla çox əhəmiyyətli qazancını yayımlayarkən yeni ucuz elektromobil barədə məlumatlar ortaya çıxmışdı. Ümumiyyətlə Elon Musk bu modelə olan ümidləri və gözləntiləri əhəmiyyətli dərəcədə yüksəldir. Hətta Elon Model 2-nin avtomobil sənayesində inqilab olacağını qeyd edir. Böyük istehsalçılara göndərilən təklif üçün sızdırılmış sorğuya əsasən yeni model gələn il kütləvi istehsala keçə bilər.
İnsayderlərin fikrincə Model 3 və Model Y modellərinin oxşarı olaraq ortaya çıxacaq Model 2 kompakt krossover dizaynına sahib olacaq. Bundan əlavə, şirkətin bir çox fabrikində istehsal ediləcək Model 2-nin 54 kVt batareyaya sahib olacağı gözlənilir. Əvvəlcə Tesla şirkəti Model 2-ni Meksikadakı ən yeni Gigafactory-də ucuz qiymətə istehsal etmək niyyətində idi, lakin icazələr və əmək haqqı ilə bağlı mübahisələr, habelə işçilərin yerdəyişməsi ilə bağlı problemlər onun fikrini dəyişməsinə və montaj yeri kimi Texas ştatını təyin etməsinə səbəb oldu.
Tesla Model 2-nin qiymət tərəfinə gəldikdə isə bu elektromobilin çinli elektromobil nəhəngləri rəqabət apara biləcəyi iddia olunur. Belə ki, elektromobilin 22 min dollar qiymət etiketi ilə qarşımıza çıxması gözlənilir. Lakin ABŞ vergiləri və digər rüsumlar nəzərə alınarsa qiymətin 25 min dollar olması qaçınılmazdır. Qeyd edək ki, elektromobilin 480 km mənzilə, 48V aşağı gərginlikli arxitekturaya və 3nm prossessoru olan hardware 5.0 FSD sisteminə sahib olması gözlənilir.
