Dünyanın ən böyük texnologiya şirkətlərindən biri olan Samsung şirkətinin keçmiş meneceri Çində cəsusluq edib. Belə ki, keçmiş menecer Çində Samsung brendinin fabriklərinin oxşarını inşa etməyə çalışıb. Bundan əlavə o, şirkətin məxfi məlumatlarının Çinə sızdırılmasında ittiham edilir. Adı açıqlanmayan 65 yaşlı keçmiş samsung meneceri brendin bütün ticarət sirlərini oğurlamaqda günahlandırılır. Qeyd edək ki, bu şəxs 18 il Samsug şirkətində çalışdığı dövrdə şirkətin məxfi məlumatlarını, dizayn rəsmlərini, çip zavodunun texniki məlumatlarını qanunsuz olaraq əldə edib. Daha sonra isə o, Çində Samsung brendinin çip fabriklərinin kopyasını inşa etməyə çalışıb.
Ümumiyyətlə bu ittihamlar, şirkətin keçmiş meneceri ilə yanaşı 5 əməkdaşına qarşı da irəli sürülüb. Sızdırılan məlumatlar əsasən şirkətin çip zavodlarının texniki planlarıdır. Lakin bundan əlavə çip zavodları ilə əlaqədar 8 qızıl qayda da menecer tərəfindən mənimsənilib. Ən maraqlısı budur ki, 18 il şirkətdə çalışan və SK hynix kimi çip istehsalı şirkətlərində vitse-prezident olan bu şəxs 2018-2019-cu illərdə göstərdiyi təşəbbüsə görə indi günahlandırılır. Belə ki, keçmiş Samsung meneceri cəsusluq əsasında əldə etdiyi məlumatlar ilə Çinin Xian bölgəsində çip fabriki inşa etməyə çalışıb. Həmçinin bu fabrikin, brendin Xianda yerləşən fabrikindən sadəcə 1.5 km məsafədə inşa edilməsi planlaşdırılırdı.
Keçmiş Samsung meneceri cəsusluq vasitəsi ilə əldə etdiyi məlumatlarla qurmaq istədiyi fabriki sərmayə olmadığı üçün reallaşdıra bilməyib. Daha doğrusu Tayvan şirkəti 6.2 milyard dollarlıq sərmayədən imtina etdiyi üçün menecerin planları da suya düşüb. Qeyd edək ki, ittiham aktında şirkətin məlumatlarının sızdırılması nəticəsində 230 milyon dollarlıq zərərə məruz qaldığı bildirilir.
