Bildiyimiz kimi, iPhone 15 seriyası Apple şirkətinin hazırkı ən bahalı və flaqman cihazlarıdır. Hər ötən il daha da sürətli olan və daha keyfiyyətli kameraya sahib olan bu cihazın maya dəyəri sizcə nə qədərdir? Məhz bu sualın cavabını əldə edə bilmək üçün, analitiklər tərəfindən iPhone 15 seriyasının maya dəyəri və ya istehsal dəyəri hesablanıb. Hazırda iPhone 15 seriyasının ə ucuz modeli 799$ qiymət etiketinə sahibdir. Bundan əlavə seriyaya dəyəri müvafiq olaraq 899$, 999$ və 1199$ olan iPhone 15 Plus, Pro və Pro Max modelləri aiddir. Gəlin görək Apple bu modelləri istehsal etmək üçün nə qədər vəsait xərcləyir.
Xatırladaq ki, bu il Apple şirkəti iPhone 15 seriyasında Pro Max modelini 100$ baha qiymətə bazara çıxardı. Məhz bunu səbəbi olaraq da 5X telefoto kamerası və digər təkmilləşdirmələr göstərildi. Əlbəttə bu dəyişikliklər şirkətə müəyyən qədər pul bahasına başa gəlir. Lakin həqiqətəndə iPhone 15 istehsal etmək bu qədər bahadırmı. Analitiklər bir çoxumuzun hər gün düşündüyü bu sualın cavabını tapa bilmək üçün iPhone 15 maya dəyəri barədə araşdırma edib. Nikkei tərəfindən dərc edilən yeni hesabatda deyilir ki, Apple-ın iPhone 15 seriyasının istehsal dəyəri sələfi ilə müqayisədə 8-16% bahadır. Belə ki, bu il iPhone 15 modeli 423 dollar maya dəyərinə sahib olub. Hansı ki, bu iPhone 14 modelinin istehsal olunması üçün çəkilən xərcdən 16% daha çoxdur.
iPhone 15 Plus modeli üçün isə çəkilən xərc 442$-dır. Bu dəyər də 14 Plus modelinə çəkilən xərcdən 10% daha çoxdur. Ən təəccüblüsü isə məhz iPhone 15 Pro modelində olub. Belə ki, bu model hazırda 523$ istehsal xərcinə malik olsa da, bu göstərici iPhone 14 Pro modelinə çəkilən xərcdən sadəcə 8% daha çoxdur. iPhone 15 Pro Max modeli isə hazırda Apple şirkətinə 558$ qiymətinə başa gəlir. Sələfi ilə müqayisədə isə qiymət 12% artıb. Görünən odur ki, inflyasiya həm də Apple şirkətinə təsir göstərib.
