Intel 2024-cü ilin üçüncü rübündə 16,6 milyard dollarla tarixinin ən böyük zərərini hesablayaraq “ilk”-ə imza atıb. Yenidən strukturlaşmağa çalışan şirkətin gəlirləri isə gözləntiləri üstələməyi bacarıb. Bununla yanaşı, hazırda Intel şirkətinin ABŞ hökumətindən böyük məbləğdə dəstək alması da müzakirə mövzusuna çevrilib.
Intel 2024-cü ilin üçüncü rübündə 16,6 milyard dollarla tarixinin ən böyük itkisini açıqlayıb. Şirkətin restrukturizasiya xərcləri, aktivlərinin köhnəlməsi və çip istehsal bölməsinin itkiləri bu rekord zərərə səbəb olan amillər kimi önə çıxarılır. Qeyd edək ki, Intel-in gəlirləri üçüncü rübdə keçən illə müqayisədə 6% azalaraq gözləntiləri üstələyib və 13,3 milyard dollara çatıb. Əvvəlki rüblə müqayisədə isə gəlirlər 500 milyon dollar artıb. Şirkətin ümumi mənfəət marjası da 15%-lik tarixi səviyyəyə düşüb.
Maraqlısı budur ki, şirkətin səhmləri bu xəbərdən sonra ilkin olaraq 12%-ə qədər bahalaşıb. Əlavə olaraq isə, ABŞ-nin Intel üçün xüsusi xilasetmə planı hazırladığı da iddia edilir. Belə ki, texnologiya dünyasının nəhənglərindən biri olan Intel, tarixinin ən pis dövrünü yaşasa da, şirkət ABŞ üçün əhəmiyyətli mövqe kəsb edir. Məlumatlara görə, Intel-in maliyyə vəziyyəti pisləşməkdə davam edərsə, ABŞ qanunvericiləri şirkətə dəstək vermək variantlarını nəzərdən keçirəcəklər. Bu potensial yardım paketi Intel-in daha əvvəl faydalanacağı elan edilmiş və 2024-cü ilin sonuna qədər ən azı 8,5 milyard dollar alacağı gözlənilən CHIPS Aktının əhatə dairəsindən kənara çıxacaq.
