Jon Peddie Research tərəfindən dərc edilən hesabata görə, masaüstü qrafik kartı bazarında Intel 0% bazar payı əldə edib. Bununla yanaşı, lider Nvidia şirkəti olub və eyni zamanda AMD üçün də işlər yaxşı gedir.
2024-cü ilin ikinci rübü üçün qrafik kartı bazarı məlumatlarına görə, Nvidia və AMD müsbət rüb keçirib. Digər tərəfdən, Intel sənayedə çətin günlər yaşadığı üçün hələ də özünə yer tapmaqda çətinlik çəkir. Jon Peddie Research-in hesabatına görə, masaüstü qrafik kartı satışları 2024-cü ilin ikinci rübündə Intel-dən başqa hamı üçün əhəmiyyətli dərəcədə artıb. Diskret qrafik kartı tədarükləri 2024-cü ilin birinci rübü ilə müqayisədə 9,4 faiz, 2023-cü ilin ikinci rübü ilə müqayisədə isə 48 faiz artımla təxminən 9,5 milyon ədədə çatıb. Üç aylıq sıçrayış orta səviyyədən xeyli yuxarıdır və güclü bərpadan xəbər verir.
Nvidia, rüblük 9,7%, illik isə 61,9% artımla bu dövrdə ən güclü zaman keçirən şirkət olub. AMD tərəfində illik artım cəmi 3 faiz təşkil edib. 2022-ci ildə Arc Alchemist seriyası ilə diskret qrafik kartları bazarına girdikdən sonra Intel qısa müddət ərzində həmin ilin sonuna doğru dörd faiz bazar payını ələ keçirmişdi. Lakin qrafik kart tərəfində olan bu bazar payı 2024-cü ildə 0%-ə qədər enib. Alchemist rəqib orta səviyyəli qrafik kartlarına alternativ təklif etməli olsa da, Intel rəqiblərinin rəqabətinə cavab verə bilməyib. Qeyd edək ki, son dövlərdə Intel şirkəti üçün işlər heç də axarında getmir. Hətta ötən günlərdə şirkəti Qualcomm tərəfində satın alına biləcəyi də gündəmə gəlmişdi.
