Texnologiya nəhəngi olan Meta şirkətinin daxilində fəaliyyət göstərən Instagram şirkətinin gün keçdikcə gətirdiyi yeniliklərin sayı-hesabı bitmir. Belə ki, şirkət ABŞ-da sınaqdan keçirdiyi yeni yaş doğrulama sistemini artıq Avropada da istifadəyə verib. Bu sistem istifadəçilərin çəkdikləri video selfiləri yaş hesablama texnologiyası ilə təhlil edib onların yaşlarını müəyyən edə biləcək. Dünya üzrə 1 milyarddan çox istifadəçisi olan şirkət hələ də yeni istifadəçilər qazanır. Buna görə də şirkət təhlükəsizliklə bağlı belə bir addım atdığını qeyd edir.
Instagram şirkətinin yeni yaş doğrulama sistemi hansı prinsip ilə işləyir?
Bildiyimiz kimi, Instagram tətbiqini rəsmi formada istifadə etmək üçün istifadəçinin ən azı 13 yaşı olmalıdır. Lakin indiyə qədər tətbiqdən istifadə edən hər kəs 13 yaşında olmasa belə tətbiqin bütün imkanlarından istifadə edə bilirdi. İndi isə şirkətin yeni yaş doğrulama sistemi vasitəsi ilə istifadəçilərin real yaşını müəyyən etmək mümkün olacaq. Bununla da şirkət azyaşlıların təhlükəsizliyini təmin edəcək.
Qeyd etdiyimiz kimi, şirkət yeni yaş doğrulama funksiyasını ilkin olaraq ABŞ-da sınaqdan keçirmişdi. İndi isə şirkət yeni funksiyanı Avropa Birliyi ölkələri və Böyük Britaniya üçün itifadəyə verib. Bu funksiyanın işləmə prinsipi belədir ki, süni intellekt istifadəçilərin yüklədiyi videonu təhlil edərək onun neçə yaşında olduğunu müəyyən edir. Bununla bağlı Instagram şirkəti rəqəmsal ID mövzusunda yüksək təcrübəyə malik Yoti firması ilə əməkdaşlıq edir. Qeyd edək ki, Yoti firmasının alqoritmlərinin 18 yaşında olan şəxslərin 25 yaşın altında, yoxsa üzərində olduğunu təyin etməsi ehtimalı 98,99% doğruluq payına sahibdir. Başqa sözlə desək, hər 1000 təxmindən təqribi 11-i yanlış nəticə verə bilər. Şirkət bildirir ki, istifadəçilərin yüklədiyi video 1 ay ərzində həm Yoti firmasından həmdə platformadan silinir. Bu sistemin digər ölkələrdə nə zaman istifadəyə veriləcəyi hələlik məlum deyil.
