2024-cü ilin birinci rübündə ötən illə müqayisədə 1% artımla 33,7 milyon planşet satılıb. Ən çox satış edən şirkət Apple olsa da, ABŞ mərkəzli texnologiya nəhənginin satışları azalıb. Belə ki, Huawei brendi Apple-dan fərqli olaraq planşet satışlarında sürətlə irəliləyib və 3-cü sıraya yüksəlib.
Bazar araşdırma şirkəti Canalys 2024-cü ilin birinci rübü üçün planşet satış rəqəmlərini açıqlayıb. Müvafiq olaraq, ilin birinci rübündə keçən illə müqayisədə 1% artımla 33,7 milyon planşet satılıb. Apple şirkəti yenidən böyük fərqlə satışlarda birinci olub, lakin şirkətin satışları keçən illə müqayisədə 13,9% azalıb. Keçən il Apple 42% bazar payına sahib olduğu halda, bu il bazar payı 36%-ə düşüb. İkinci yerdə 20% payla Samsung qərarlaşıb. Cənubi Koreya nəhəngi ötən ildən öz payını qoruyub saxlaya bilib. Ən böyük sıçrayış isə Huawei brendində qeydə alınıb.
Huawei smartfon bazarında olduğu kimi, planşet bazarında da öz gücünü bərpa etməyə başlayıb. Belə ki, ötən il 5% bazar payına malik olan şirkət bu ilin birinci rübündə satışlarını 70%, payını isə 8%-ə çatdıraraq 3-cü yerə yüksəlib. Bildiyimiz kimi, Huawei Amerika embarqosu səbəbindən Google xidmətlərinə daxil ola bilmədiyi üçün satışlarının böyük hissəsini Çində həyata keçirir. Çin nəhəngi rəqabətə tab gətirmək üçün gələcəkdə daha güclü çipsetlərdən istifadə etməyi planlayır. Bu çərçivədə, Huawei Mate 70 seriyasının oktyabr ayında şirkətin ilk 5 nanometrlik Kirin prosessoru ilə təqdim ediləcəyi deyilir. Bundan əlavə, uzun müddətdir iPad-lərini yeniləməyən Apple, bu gün keçiriləcək “Let Loose” tədbirində M4 prosessorlu OLED iPad Pro seriyasını açıqlayaraq planşet bazarında yenidən yüksəlməyi hədəfləyir.
